uMthunywa
ABANTU abangomama inengi labo angazi badaleka njani ufica bevezelana elenja behleka kuze kukhanye isilakalaka, kodwa ukuvela omunye wabo afulathele avalelise sekusalwa kukhulunywa ngaye, kuvame ukuba yizinto ezimbi njalo ezingamanga.
Ngikhumbula abanye omama bezixoxela benganake lutho, bathi sebezakwehlukana kwezwakala omunye wabo esithi sokungene umlayezo wokuthi umakhelwane wabo okade egula kasekho, kumakhalekhukhwini.
Lowo umlayezo owafikela kuye wahle watshela abangane wahle wabhekisa amabombo khonale ngokuphazima kweso. Kuthe lowo esahambile kwasala kusitsha ingxoxo yokuthi akula nto ayigijimelayo ufuna ukuyaswaya abantu ukudla esililweni sengani uyakwazi lokuthi kuthengwa malini.
Ngezwa omunye wakhona ethi kasuki ezimbizeni kakhulu ezilenyama ngoba esenzela ukubafakela enlutshwane, kusale enengi nxa abantu sebechithekile basale bezitika balale ngesibomvu enye baze bayithwale ngezinkonxa sebehamba layo emakhaya abo.
Abayabe beze esililweni bahambe benambitha bengakukholwanga ukudla kwemfeni amagovu esekutshwathike emgodleni.
Omama abanengi sebeqhelile ukuncitsha abantu emfeni besenzela ukuthi kusale bakhohlwe ukuthi lokhu kudla kuyabe kulungiselelwe imfa yonaleyo nxa wena usukuthwala uhamba lakho ngakini ngelinye ilanga uzathola abathiyayo ngemithi ukuhwabe ukuthwale kanti suqukule ukufa usiya lakho ngakini ziphele izihlobo zakho kuze kucatshangelwe ukuthi sokungene uzimu kanti cha.
Ayixabene.
Umlobi ungamthinta ku: 0714355641
