uMthunywa
NguThando Mpofu
UMPHANTINTAMBO womnyango wezemfundo yaphansi laphezulu usekhuthaze labo abafisa ukuba ngababalisi ukuthi bafundele ukufundisa ezinye indimi ngaphandle kwesiNdebele lesiShona ngesikhathi besemakolitshini.
Ekhuluma lentatheli ecingweni uDokotela Lazarus Dokora ukhuthaze labo abafundela ububalisi ukuthi basekele uhlelo lokuqala ukufundwa kwezinye indimi ezikolo ezifana lolimi lwesiTonga, Sotho kanye lesiNambya.
“Ababalisi abenelisa ukufundisa ezinye indimi ezikhulunywa kuleli lokhe besilela kungakho sesenze isivumelwano leyunivesithi yeGreat Zimbabwe ukuthi yamukele labo abafisa ukufundisa indimi ezifana lesiSotho, Nambya kanye lesiTonga phakathi kwezinye indimi.
“Sikhangelele ukuthi kube lababalisi abambalwa abazathatha ithuba leli lokuyafunda eyunivesithi le ukuze basekele uhlelo lwethu lokufundisa indimi zonke eziselizweni lakithi,” kutsho uDkt Dokora.
Uqhubeke wathi ababalisi bazadingakala ngeminyaka ezayo njengoba ugatsha lwakhe lusaphakathi kokulungisa ukuthi indimi zonke elizweni zifundwe njalo zibhalwe kumihloliso kumabanga atshiyeneyo.
“Okwakhathesi sesilendimi ezifana lesiTonga esesivivinywa kusigaba seO-Level. Amabhuku abhalwe ngolimi lolu asekhona.
“Kukanti-ke indimi ezifana lesiSotho kanye lesiNambya zibhalwa kusigaba sikaGiredi 7,” kutsho uDkt Dokora.
Ukwamukelwa kokuthi ezinye indimi lazo zifundiswe ezikolo kuze ngemva kokuba isisekelo sombuso welizwe siqale ukunanza ezinye indimi ezikhulunywa kuleli.
