uMthunywa
Cornelius Luphahla
SEZIHLALELA evalweni izakhamizi zakoSogwala ngenxa yezulu okubikwa kalitshayi nje abantu kule indawo lilomuntu phansi nanko phela selitshaye abantu abathathu labulala ababili.
Isiga lesi kubikwa siqale ukwenzakala mhlaka 26 Zibandlela lapho izulu leli elitshaye khona uAnna Moyo (61) ohlala esigabeni seLynos ngaphansi kwenduna uMalisa wafa labuya njalo latshaya abantwana ababili esigabeni seDufuya kwafa oyedwa ngeSonto kuyonale iviki.
UMthunywa ukhulumisane lesinye isakhamuzi sesigabeni seLynos uNkosazana Lisca Mathe sachaza ukuthi uNkosazana Moyo watshaywa yinkosazana ngezikhathi zemini elunguzile phandle.
“Kuthiwa uMaMoyo watshaywa yinkosazana ngehola lesithathu emini ngethuba elunguza phandle ukuthi izulu lingabe lisina okunganani. Ekutshayweni kwakhe wahle wafa khonapho kwathi labo ayelabo endlini bamthwalela phandle njengoba indlu yayisisitsha ngenxa yenkosazana le,” kutsho uNkzn Mathe.
Intatheli ibuye njalo yaxhumana lomunye wezihlobo zikamuyi uMnumzana Cain Ndlovu ochaze ukuthi isiga sokutshaywa kwabantwana laba lizulu uyasazi.
“Abantwana abatshaywe lizulu eDufuya bebebabili ngakho bekungumfana lenkazana. Umfana wakhona engaba leminyaka engu-19 njalo uhlala eDufuya kuthi inkazana ibileminyaka engu-18 kodwa yona ihlala eSikhombingo ngaphansi kukaSobhuku uPhilip Moyo.
UMnu Ndlovu uqhubekele phambili njalo wachaza ukuthi abantwana laba kukhanya babethandana njalo kwafa oyedwa kwasala oyedwa.
“Ngokubona kwami abantwana laba babethandana kwasokusiba ngumnyama batshaywa lizulu behamba bonke.
Ongumfana lo nguye owahle wafela khonapho atshayelwa khona lizulu kuthi oyinkazana ngikhuluma nje useGeneral Hospital eGweru.
“Ngakho-ke lokhu kuyisimanga esikhulu esigabeni, kutshengisa ukuthi kungabe kukhona owathumela abantwana laba izulu leli ngoba esilwa labazali babo. Okusuka kumangalise yikuthi uyise womfana lo otshaywe lizulu laye ulalisiwe esibhedlela seGeneral ngenxa yengozi yemota emehlele kuyonale iviki,” kulandisa uMnu Ndlovu.
Isikhulumeli samapholisa esabelweni seMidlands uInspector Goko uchaze ukuthi endabeni zokutshaywa kwabantu lizulu bazi eyodwa.
“Indaba esiyaziyo eyokutshaywa kwabantu lizulu ngekagogo weLynos ngakho le eyalaba abanye abeDufuya asikayizwa ngakho sisazoyidingisisa,” kuphetha uInspector Goko.
