uMthunywa
Musa Janga
ABABONA ngokugcineka kwezinja zeganga abePainted Dogs Conservation eHwange bathi izinja lezi sezizilutshwana kwelakithi, kakhulu ngoba abantu behlezi bezibulala.
Kubikwa izinja lezi ziyingozi kodwa kukhona okunye okungenziwa kulokuthi zibulawe. Izinja lezi ziyisibonakaliso semvelo yeAfrica ngakho ukubulawa kwazo yikubulala imvelo lobuhle belizwe.
UMthunywa ukhulumisane lobona ngezeMarketing and Communications uMnumzana Ronnie Sibanda obikele iphephandaba likazulu ukuthi sebaze badinga amanye amacebo okuthi kufundiswe abantu ngazo lezi zinja.
Elinye lamanye macebo uthe yiAnti Poaching Unity Team yona okuyabe kuliqembu lamadoda ayabe ekhangela ababulala inyamazana okungekho emthethweni kugoqela izinja zeganga.
“Siyazama ngawo wonke amandla ukuthi sizivikele lezi zinanakazana ngoba seziphela kwelakithi, singekela ukwenza lokhu ziyacina ziphele du,” kuchaza uMnu Sibanda.
Uqhubekele phambili wathi esikhathini esinengi abantu bayabe bezibulala inyamazana ezidlekayo njengempala lamabhalabhala ngakho zona lazo zihle zibulawe ngaleso sikhathi.
“Kulabantu ababuya ukuzobulala impala lamabhalabhala ngokungekho emthethweni ngakho ngaleso sikhathi umuntu uhle adubule lazo izinja lezi,” kutsho uMnu Sibanda.
Kubikwa abantu abanengi balenzondo enkulu kulezi zinja ngoba bethi ziyalimaza njalo bayazibandlulula.
Ukuqhubekela phambili kubulawa lezi zinja sizacina siswela ama-tourist azabuya elizweni lethu ngoba inengi labo bayathanda ukuzozibona, njengoba lababantu yibo abasingenisela imali eyakwamanye amazwe ngakho lokhu kuzenza ilizwe lethu lingathuthuki kuhle.
“Abantu bakwamanye amazwe bajwayele ukubuya bezobona lezi zinyamazana ngakho nxa singazibulala ziphele kuzenza ukuthi siswele imali zakwamanye amazwe,” kuphetha uMnu Sibanda.
