uMthunywa
Thokozile Mbedzi
ZIDLELA evalweni izakhamizi zelokitshini eliseduze lesilindweni samabhasi eBeitbride ngemva kokuba zingenelwa ngamanzi ezindlini ngenxa yezulu eline kakhulu ngoLwesithathu kuviki ephelileyo.
Izakhamizi zelokitshi elincelelane leRenkini zithwele nzima ngokungenelwa ngamanzi endlini osokulimaze impahla yazo njalo sezisesabela ngitsho lempilo zazo ukuba isengozini ngoba nxa amanzi engangena ebusuku abanye belele kungaba lengozi enkulu kakhulu.
Ekhuluma lentatheli kaMthunywa omunye wabahlali bakulundawo uMbongeni Mudawu uthe ubunzima lobu bamanzi ababhekane labo buzwisa ubuhlungu ngoba amanzi ayingozi enkulu kakhulu njalo abantwana nxa bebodwa kubanzima ngoba bengazivalela ezindlini kubeyingozi ngoba bengasoze babe lakho ukucabanga nje ngabadala.
“Ubunzima esibhekane labo bunzima kakhulu ngoba amanzi ayingozi ikakhulu ebantwaneni. Abazali abanengi bayasebenza nxa ephumile waya emsebenzini abantwana balakho ukuzivalela endlini bengazi ukuthi basengozini.
Impahla sezonakele asazi ukuthi sizazithatha ngaphi ezinye ngoba inengi lithwele nzima imisebenzi eminengi kayikavulwa. Sihluphekile silapha ngoba labantu ezindlini zabo kabasifuni ngenxa yeCovidi 19,” kulandisa uMnu Mudawu.
Umeli wedale lephalamende weBeitbridge East uAlbert Nguluvhe ebuzwa ngodaba lolu uthe kuyadanisa ukuba izakhamizi zihlukumezeke ngaloluhlobo.
“Sizazama ngazo zonke indlela ukuba sikhulumisane leziphathamandla zogatsha lweLocal Governance ukuze omanjinela benze kuhle umsebenzi wabo. Kungaba kuhle ukuba kwakhiwe izitezi ezilendlela ezilungileyo zokuhambisa amanzi. Kuyadingeka futhi ukuba abantu laba basuswe lapha ukuze bavikeleke,” kuphetha uNguluvhe.
