uMthunywa
Pumulani Mpofu
Izikolo zaziwa kuyindawo ehlelekileyo njalo edlala indima enkulu kakhulu ekufundiseni abantwana ukubana bekhule ngendlela efaneleyo njalo babe lekusasa elihle. Izikhathi ezinengi izikolo yizo ezikhankasela amalungelo abantwana.
Nxa umntwana eqala ukungena esikolo inengi labaphathisikolo bafuna angene ethwele incwadi yokuzalwa. Nxa umntwana sethe wangena esikolo ziyajika izinto abantwana sebexotshelwa indleko zokufunda ezingabhadalwanga ngabazali.
Inengi labantwana selifela inhlupho zabadala zokwehluleka ukubhadala izimali zesikolo. Kodwa-ke kumsebenzi wethu enhlanganisweni yaseTrinity Project sidibana lezinye indaba ezihlasimulisa umzimba udinge uswele ukubana umhlaba ususiba yini nxa ungasanakekeli amalungelo abantwana.
Kule iviki ngidibane lolunye udaba olungiqandise amadolo ngesikhathi ngixoxisana kabanzi lomnikazi wodaba.Yonale iviki sivakatshelwe ngomunye untombazana okuthiwa nguSichelesile Maseko. USichelesile uleminyaka elitshumi lasitshiyagalombili njalo ungumuntu ophila elegcikwane leHIV.
USichelesile Maseko wayefunda uFomu 3 esikolo thize esiseNkayi. Ekufundeni kwakhe uSichelesile Ndlovu wayehlala labazali bakhe kodwa bengabantu abangenelisi ukusebenza ngoba behlaselwe bephathekile emzimbeni.
USichelesile wafunda-ke kodwa engabhadali indleko zesikolo waze wacina sexotshwa esikolo. Ekuxotshweni kwakhe umphathisikolo wasuka-ke wabamba incwadi yakhe yokuzalwa wabikela abazali bakhe ukubana bazayithatha mzwana beqedisa isikwelede sendleko zesikolo.
Kodwa-ke njengoba sonke sisazi ukubana isimo somnotho welizwe sime manzonzo lenengi labantu alisebenzi kwasuka kwabanzima ukubana abazali babhadale isikwelede. Kwedlula izinyanga leminyaka uSichelesile wacina ezithwala wazibula ngendodakazi yakhe uSihle Maseko kodwa-ke kazange aphiwe i-birth confirmation record ngoba iphiwa umuntu olesithupha.
USichelesile Maseko weza-ke eTrinity Project ezodinga ukwelulekwa ngalokho angakwenza ukuze athole usizo ngencwadi yakhe yokuzalwa. Okwakuqala akukho emthwethweni ukubana isikolo sigcine incwadi yokuzalwa komntwana ngenxa yokubana ulesikwelede.
Thina njengenhlanganiso ekhankansela amalungelo abantwana saphanga saqonda khona esikolo ukuze siyezwisisa ngaloludaba. Safika-ke saxoxisana lomphathisikolo wasichazela kabanzi ukubana bebezama ukukhuselela abazali ukubana bakhokhe indleko zesikolo, njalo isifiso sabo bekuyikubana abazali baphange baphungule izikwelede sabo.
Emaphethelweni engxoxo uSichelesile wayithola incwadi yakhe yokuzalwa wajabula kakhulukazi. Kwasuka-ke kwabakubi ngoba indodakazi yakhe yaphatheka ngomkhuhlane kwasekuvimba ukuthathwa kwesithupha sakhe.
Silethemba ukuba uSichelesile uzaphanga athathe isithupha sakhe njalo aqale ukusebenzela izingane zakhe ngoba ngiloba nje uzithwele isisu somntwana wesibili.
Ingqobe ngiyitshiya kithi bazali ukubana kasizameni ngazo zonke indlela silungise ikusasa labantwana bethu ukuze baphile ngcono njalo sisebenze gadalala ukuze sikhokhe zonke izindleko zesikolo.
Asihlanganeni kuviki ezayo.
Umlobi utholakala kunombolo zocingo ezithi 00263 773 155 055 lakukheli elithi [email protected]
