uMthunywa
Ethel Ncube
UGATSHA olubona ngezemfundo kuleli soluveze ukuthi izikolo zonke kumele zamukele ama-$15 e-examination fee kusalindwe ukuthi kuqediswe izingxoxo ngokukhwezwa kwemali le.
UMsekeli kaMphathintambo wogatsha olubona ngezemfundo Mnu Edgar Moyo uthe izikolo zonke kungakhathalekile ukuthi ngezikaHulumende loba ngezizimeleyo kumele zamukele ama $15 e-examination fee ye Ordinary Level le $26 Advanced Level.
Lokhu kuza ngemva kokukhalaza kwabanye abazali abathi ezinye izikolo zithi babhadale imali ezethulwa kumaviki edlulayo ezibalisa i$190 ye O-Level le $351 ye A-level kukanti ezinye izikolo zimise abazali zithi akukacaci ukuthi kumele zibhadalise malini.
“Ngiyadana kakhulu nxa kulabaphathi abangathi sebedidekile ngemali okumele zibhadalwe ngabazali kukanti zathumela izincwadi ezikolo zonke eziselizweni.
“Nxa umphathi elakho angakuzwisisiyo kumele axhumane lalabo abasemawofisini ezemfundo ukuze bazwisise ngombiko okhona okwamanje,” kutsho uMphathintambo Moyo.
Uqhubekele phambili eveza ukuba abazali kababhadale yonale imali endala yemihloliso nxa kungadingeka ukuba bangezelele kuzabikwa ngokufanayo.
“Okwakhathesi abazali kababhadale ama $15 lama $26 sisenza izingxoxo nxa imali kumele ingezelelwe bazatshelwa njalo uHulumende uzabanika isikhathi sokuthi badinge leyomali yokungezelela.
“Kulabo ababhadale ama-$190 bangakhathazeki kakhulu bazabiselwa imali zabo nxa kudingeka. Kungakho-ke ngikhuthaza abaphathi bezikolo zonke zeZimbabwe ukuba bathathe imali zemihloliso ezabikwa ekucineni bangalisi abazali ukuthi babhadale,” kuphetha uMoyo.
