uMthunywa
SIYADIBANA njalo bafundi ngeviki yokuvulwa kwezikolo sikhangela ezolimi lwethu phela. Ake silukholiseni-ke ulimi lwethu silola lolwazi lwethu. Ngiyazi ukuthi inengi lenu selilolwazi olujulileyo njalo lizanambithelwa lulimi lamhlanje
Asijuliseni ingqondo
(1) Uyabe enjani umuntu nxa kuthiwa:
(a) Yinsumbelume — ngumuntu wesilisa osefanele ukuthi ngabe sewathatha kodwa elokhu engakathathi.
(b) Ngumfelokazi — ngumfazi owafelwa yindoda.
(c) Yisigwadi — ngumuntu wesilisa ongakhonjwayo.
(d) Yingalane — ngumuntu olomzimba omkhulu kodwa imbala imncane.
(e) Umfelwa — yindoda efelwe ngumfazi.
(f) Umjendevu — yintombi engakhonjiswayo.
(2) Emitshweni elandelayo bhala igama elilodwa elitsho into efanayo.
(a) Lamuhla sizakudla umumbu owaphekwa wachaywa. — Ufutho.
(b) Lungisani umumbu, amazambane, inyawuthi lokunye ngoba sekusondele ukulima. — Inhlanyelo.
(c) Uthanda ukufaka amazambane acholiweyo esitshebeni. — Idobi.
(d) Imbuzi ube eyikhunge ngomchilo owenziwe ngengxoza. — Igoda.
(e) Lapha okufiwe khona kuzwakala ngabantu bekhala. — Ngesililo.
(f) Umuntu lo uhamba ehlala lapha lalapha. — Ngumhambuma.
(g) Wena uthanda ukukhuluma njalo. — Uyalawula.
(h) Umama uzayifaka amathikili okuqala kusasa indlu entsha. — Ijumo.
(i) Inkomokazi yami yehlisile, isize isikhupha uchago ingakasengwa. — Isizisenga.
(j) Asidle nansi inyama ephekwe izolo. — Isikhupha.
(k) Amaxhegu athanda ukudla amathumbu amancane. — Amalulu.
(l) Landa into yami engigcinela kuyo igwayi lamakhala. — Imfuko.
(m) Ngithengise inkomo engehlisiyo. — Isigqala.
(n) Ungithengisele umntwana wembuzi. — Izinyane.
(o) Basiphe inyama yenkomo ezifeleyo. — Ingcuba.
(p) Simnandi isitshwala samabele akhitshwe emgodini. — Somncantsha.
(q) Ngihlangane lomuntu oloboya umzimba wonke. — Ihwanqa.
(r) Bahlabe inkomo ephiwa unina entombi enkomeni zamalobolo. — Inkomo yohlanga.
(s) Ngethuswe yisikhumba esihlutshwa yinyoka. — Likhasi lenyoka.
(3) Amagama aphikisanayo.
(a) iqhawe igwala
(b) ukuzaca ukuzimuka
(c) iqiniso amanga
(d) isichaka inkosi
(e) isitha umngane
(f) umqando ukutshisa
(g) ukuncitshana ukuphana
(h) isibindi ubugwala
(i) iqhathanzipho itshapha
(j) gubha gqiba
k) inhlanhla umnyama
Bafundi akesime lapha okwalamuhla sizahlangana kuzifundo ezilandelayo.
