uMthunywa
Khanyile Ndebele
KULABOMAKOROKOZA abathathu beLumene, eGwanda abagongodwe bahlahlelwa langamahloka, bafa kulandela ukuthumba enye indoda abayifice ihamba lentombi efunwa ngomunye wabo.
Kubikwa omakorokoza laba, uEphat Sibanda oleminyaka engu-30 yokuzalwa, Brian Moyo (31) lomunye owaziwa ngokuthi nguShorty bahlaselwe babulawa ngabanye abane abalokhu besadingwa ngamapholisa.
Kuzwakale ukuba mhlaka 15 Mpalakazi ngehola lesikhombisa ntambama, uSibanda labanye bakhe, bafica uPrince okungasatholakalanga isibongo sakhe elentombi yakhe uFaith Moyo benatha utshwala.
Kubikwa abathathu laba balanda uPrince bambuza ukuba kungani ebathathele intombi yabo andubana bamhlasele bamthumbe baye laye etendeni labo.
UMthunywa uzwe njalo ukuba phakathi kobusuku, kwathutsha omakorokoza laba abane okutholakale ukuthi nguKhumalo, Mdawini, Godlwayo lowesine ovezwe ngokuthi nguRasta nje kuphela.
Abane laba babethwele izikhali ezibalisa induku, amahloka lensimbi bafika bahlasela abathathu abathi uSibanda, Moyo loShorty batshiya bethe daca phambi kwetende befile.
UMthunywa uthintane lesikhulumi samapholisa esabelweni seMatabeleland South uInspector Loveness Mangena, othe amapholisa achwayisisa ngesehlakalo lesi.
“Sichwayisisa isehlakalo lapho abetheswacala abafika bahlasela amadoda amathathu ngezikhali bawatshiya elele phansi elimele kakhulu. Ngokusweleka kwenhlanhla bacina besedlula,” kutsho uInsp Mangena.
Uphethe ngokuthi bakhuthaza uzulu ukuthi angathwali izikhali eziyingozi njalo benqabele ukuyagebha igolide endaweni ezingekho emthethweni.”
