uMthunywa
Wayne Ncube
KUDABA olutshwaqisa umzimba, sokuvele ukuba kulamadoda amabili ayizelemani abeseleminyaka ebamba amadodakazi awo amabili iganyavu okwacina kubangela ukuthi oyedwa azithwale.
UNduna Sibanda (52) lomfowabo uRayton Sibanda okungasatholakalanga iminyaka yakhe yokuzalwa batholakala belecala lokudlwengula amadodakazi abo la aleminyaka yokuzalwa engu-15 le-12.
Amantombazana la azalwa nguNduna njalo nguye owaze wamithisa indodakazi yakhe le endala.
Okuyisimaga yikuthi obaba laba ababili bahlukuluza abantwababo laba bona belamakhosikazi.
Intatheli kaMthunywa ifike emzini wakoNyathi eGomoza, eLupane lapho okuzalwa khona uNkosazana Regina Nyathi ongunina wamantombazana akade ehlukunyezwa emacansini ngoyise.
Umama wamantombazana la uveze ukuthi isiga esasisenzakala emzini wakhe babesifihlile okwesikhathi kwaze kwavela linsumansumane ngemva kokuba umntwana lo omdala esebelethile ngemva kokumithiswa nguyise.
“Kuliqiniso ukuthi umkami wamithisa indodakazi yethu njalo ubabomncane laye wayehlukuluza indodakazi yami enye encane emacansini kodwa mina akula engangingakwenza.
“Ubaba waxolisa kimi wangitshela ukuthi uphambanisile yikho ngingazange ngibone isidingo sokuthi ngibikele abantu, khathesi yiloba evalelwe entolongweni silokhe sisonke.
“Yebo ngiyavuma ukuthi ubaba nguye owamithisa indodakazi yethu, kubuhlungu kodwa lami ngaphelelwa.
“Indaba le ukuze ivele emphakathini kwakungemva kokuba indodakazi yami endala eyayikhulelwe isibelethile, ubabakazi wakhe wezwa kuthiwa sokulomntwana wahle waba lolukuluku lokuzwa ukuthi kungani engabikelwanga ukuthi umntwana uzithwele njalo wayefuna ukwazi ukuthi ngubani owone umntwana,” kutsho uNkszn Nyathi.
Uyisekazi wabantwana kubikwa wakunanzelela ukuthi kukhona okunuka santungwana wadinga ulwazi andubana afumane ukuthi abantwana bebehlukuluzwa ngabafowabo okwabangela ukuthi ayebikela amapholisa abasolwa babotshwa.
Intatheli yephephandaba likazulu ixoxe njalo losobhuku wakule indawo uMnumzana Joel Tshuma othe ngaphambi kokuba indaba le ivele kunengi okwakuvele kusolisa ngoMnu Sibanda labafowabo.
“Basuka lapha eGomoza bengabikelanga muntu ukuthi sebethutha, kwabonakala nge ngolovane enkulu isizothwala impahla, kungakho-ke sabuza ukuthi kuyiwa ngaphi sezwa kuthiwa sebesiyahlala esigabeni seNengasha eBinga ngaphansi kukaSobhuku uBernitor Ndlovu.
“USibanda ubevele engumuntu obamba nxa zonke nxa kusiza kwezokholo, ubesiya enkonzweni aphinde enze okwamasiko kanye lamadlozi.
“Sithe sisizwa ukuthi yena lomfowabo bebehlukuluza amadodakazi kaNduna emacansini sadana kakhulu abanye bezibuza ukuthi mhlawumbe bekuyikuqinisa into ezimbi azenzayo kumbe ngumuntu ongela nembeza nje,” kutsho uSobhuku Nyathi.
Intatheli iphinde yakhulumisana lentombazana le eyamithiswa nguyise (ibizo siligodlile) yachaza ukuthi uyise akusi yena yedwa obeyihlukuluza.
“Ubaba kayisuye wakuqala ukungihlukumeza ngokocansi, owaqala ukungidlwengula nguDanisa okungumuntu oweza ngakithi elande ukuzokwelatshwa ngubaba.
“Abadala bathe benanzelela ukuthi ungibambe iganyavu bamhlawulisa kuphela, abazange bambophise.
“Okwangimangalisayo yikuthi ngemva kwesikhatshana nje ubaba kukhanya laye wakubona kufanele ukuthi angihlukuluze emacansini khepha akuhlalanga isikhathi ngemva kokuba ehlawulwe nguDanisa mhlawumbe yikho okwamnika igunya lokuthi ngingaba yisichaka semacansini.
“Ngesikhathi ebuya kimi wathi ngithembise ukuthi kangisoze ngatshela muntu ngoba lokhu ukwenzela imuli yakithi.
“Lami ngesaba ukukhuluma kodwa ngesikhathi umama ethola ukuthi sengizithwele ngavela ngambikela iqiniso ukuthi konke kwenzakala kangaki njalo lokuthi ubaba wayeselala lami kanenginengi,” kuchaza lintombazana.
USobhuku uTshuma usekele amazwi entombazana le wathi uMnu Sibanda lonkosikazi wakhe bahlawulisa uDanisa Sibanda owayeyisethekeli emzini wabo kodwa engasisihlobo imbuzi ezine kanye lemali phezulu, ngesikhathi etholakale emacansini okokuqala lendodakazi yabo.
Uthe ngenxa yokuthi uDanisa wahlawula kabazange babikele amapholisa.
Uqhubekele phambili wathi uzakwenza konke okusemandleni akhe ukuthi adinge lo onguye owaqala ukudlwengula umntwana wakoSibanda ngoba lokhu akwamukeleki esigabeni sakhe njalo kulihlazo ukuthi kuvele kutshiywe kungalungiswanga.
Intatheli iphinde yakhulumisana loMnumzana John Nyathi umfowabo kaNkszn Nyathi unina wabantwana waveza ukuthi bona njengemuli babengaziswanga ngaloludaba.
“Kwavela ukuthi umntaka dadewethu uzithwele ngesikhathi esezabeletha. Okwasikhathazayo yikuvela kokuthi lomfowabo womkhwenyana laye wayehlukuluza umnawakhe kalo owazithwalayo. Owancedayo ngubabakazi womntwana onguye owabika udaba lolu emapholiseni yikho lapho uNduna Sibanda lomfowabo ababotshwa khona nyekenye,” kuchaza uMnu Nyathi.
Intatheli kaMthunywa ikhulumisane lesikhulumi samapholisa eMatabeleland North u-Inspector Mashona Namatirai oveze ukuthi amapholisa asaphenyisisa ngoDanisa Sibanda onguye owaqala ukuhlukuluza untombazana lo njalo ongakabotshwa.
“Senza konke okusemandleni ethu ukuthi siluphenyisise loludaba ngoba lathi sinje sasingelalwazi lokuthi ukhona omunye owayedlwengule umntwana lo ngaphandle kukayise,” kuphetha uInspector Mashona.
