uMthunywa
Cornelius Luphahla
KULEZELAMANI ezintathu zesigabeni seShangagwe eFort Rixon ezihlasele enye indoda ebhawa zayibulala ngemva kokuxabana kubangwa ukuba zachitha utshwala bayo.
Isehlakalo lesi senzakale ngeSonto kuyonale iviki lapho uShepherd Msipha, uMandla Msipha kanye loStanley Msipha abahlasele khona uJealous Ngwenya andubana uMandla amgwaze ngengqamu wafa bebanga ukuba kungani uJealous etshaye uShelton umngane wabo obechithe utshwala bakhe.
UMthunywa ukhulumisane loMnumzana Talent Nkomo owayekhona mhla kusenzakala lesisiga wathi umsindo lo waqalwa ngumngane kaMandla owachitha utshwala bukaJealous.
“Umsindo lo waqala ngemva kokuba uShelton umngane kaMandla echithe utshwala bukaJealous wabuya wamkhahlela ezama ukukhahlela uEdwin. Kuthe kunjalo uJealous wasukela uShelton ngenqindi kwahle kwaqala impi le.
“Ngemva kwalokho uMandla labafowabo bathelela uJealous, uMandla wakhupha ingqamu wamgwaza esifubeni esandleni senxele.
“Umuyi wathwalelwa esibhedlela seShangani okuyikho lapho afele khona. Ngikhuluma nje isidumbu sakhe sisahlolwa koBulawayo esibhedlela,” kulandisa uMnu Nkomo.
Ekhuluma lentatheli uNkosazana Sakhile Ngwenya oyisihlobo sikamuyi ubikele intatheli ukuthi uzwa ubuhlungu ngokugwazwa komnewabo njalo ufisa ukuba izelamani lezi zigwetshwe ngoba sezihluphile.
“Mina ngizwa ubuhlungu kakhulu ngokugwazwa komfowethu ngabafana bakoMsipha khonapho engelacala. Kusiya ngami ngabe bayagwetshwa bonke iminyaka eminengi ngoba bavele sebehluphile esigabeni ngokutshaya abantu lokutshontsha impahla zabantu.
“Ngikhuluma nje kunyanga ephelileyo batshaya umntakamakhelwane bamlimaza qede bamtshontshela imali kodwa isimanga yikuthi kabazange babotshwa,” kutsho uNkszn Ngwenya.
Isikhulumi samapholisa esabelweni seMatabeleland South uInspector Philisani Ndebele ebuzwa ngale indaba uvumile ukuthi sebeyizwile wakhuthaza uzulu ukuthi ananzelele ingozi ezinjalo.
“Indaba yokugwazwa kukaJealous Ngwenya nguMandla Msipha sesiyizwile ngakho ngikhuthaza uzulu ukuthi aqaphele ingozi ezinjalo ikakhulu emabhawa ngoba ingozi zinengi kulezinsuku,” kuphetha uInsp Ndebele.
