uMthunywa
Cornelius Luphahla
KULANDELA ukwekela kwabafundi abangu-60 ukuya esikolo ngemva kokuvalwa kwe-bush boarding eMlamuli Secondary School ngumphathisikolo kubikwa izakhamizi sezikhiphe abantwabazo esikolo zathi kasivalwe umphathi lo aze asuke kulesisikolo ngoba kafuni kukhuluma isiNdebele njalo udla lemali yesikolo.
Indaba le yenzakale ngoMvulo kuyonale iviki lapho izakhamizi zeGumede eLupane ezikhiphe abantwabazo esikolo zavala isikolo zithi zizasivula uNkosazana Bonyongwe engasuka kulesisikolo ngoba sezikhathele ngaye.
Kubikwa izakhamizi lezi zenze umhlangano ngoLwesine zatshela umphathisikolo lo ukuthi asuke kulesisikolo kungafiki uMvulo ekhona ngoba kazisamfuni, nxa kungenjalo zizavala isikolo lesi umphathisikolo lo wangasuki okudale ukuthi zivale isikolo.
UMthunywa uxhumane lesakhamuzi sakule indawo uMnumzana Learnmore Magutshwa oyisakhamuzi sakule indawo oveze ukuthi umphathisikolo lo kafuni ukukhuluma iSiNdebele emhlanganweni.
“Umphathisikolo lo ufike lapha ngoMpalakazi kumnyaka ophelileyo kodwa sokuze kulamuhla kenenelisi ukukhuluma isiNdebele.
Nxa sisemhlanganweni ukhuluma ngesiKhiwa khonapho inengi lezakhamizi kazisizwa.
“Isimanga yikuthi wasuka eGeorge Silundika eNyamandlovu lapho ayeseleminyaka emithathu efundisa khona kodwa lokhu engasazi isiNdebele okuveza ukuthi kafuni ukusifunda,” kutsho uMnu Magutshwa.
UMnu Magutshwa uqhubekele phambili waveza ukuthi umphathisikolo lo usebenzisa imali yesikolo ngokungekho emthethweni.
“Umphathisikolo lo nxa ehamba emhlanganweni uthatha imali enengi ethi uzayidla emhlanganweni khonapho engavumelananga lekhomithi yesikolo ethi nxa isala uzazikhethela eyakhe.
“Okubuhlungu yikuthi waxotsha abantwana ababehlahla esikolo waze wababiza ngemva kokukhonona kwethu kodwa abanye babo bahle bayekela isikolo ngoba behlala khatshana,” kutsho uMagutshwa.
UNkosazana Simayedwa Makhwelo omunye walezizakhamuzi ubikele intatheli ukuthi babhalela abezemfundo bebazisa ngokuthi umphathisikolo lo kabamfuni bathi bazamsusa kodwa lokhu bengakakwenzi lokhu.
“Kuthemu ephelileyo sibhalele abezemfundo incwadi sibazisa ukuthi umphathisikolo lo kasisamfuni basiphendula besithembisa ukuba kule ithemu bazaletha omunye.
“Isimanga yikuthi sokuze kulamuhla elokhu ekhona njalo nxa sikhuluma laye uthi kasuki uzasitshiya sesiqondile. Okunye njalo uyathethisa abantwana ethi bahlala komnyamubambile yikho bengaphumeleli ezifundweni,” kutsho uNkszn Makhwelo.
UMnumzana Titus Masina uthe uzwa ubuhlungu kakhulu ngoba amapholisa ababophile ethi kungani bexotsha umphathisikolo bethi abantwababo bengafundi.
“Ngizwa ubuhlungu kakhulu ngoba sithe sesikhiphe abantwabethu esikolo umphathisikolo lo wafonela amapholisa waqamba amanga ethi sokulomsindo esikolo khonapho singazange salwa lomuntu.
Amapholisa la athe efika abopha izakhamizi ezine uMbuso Nkomo, uMbonisi Khoza, uPeter Ndlovu lo\Thabani. Asazi ukuthi kungani ebabophile njengoba bebethunywe yizakhamizi,” kuchaza uMnu Masina.
UMqondisi wezeMfundo esabelweni seMatabeleland North uNkosikazi Boithatelo Mnguni ebuzwa ngale indaba uthe sebeyizwile ngakho bazayilungisisa.
“Indaba yokuvalwa kwesikolo seMlamuli ngabazali sesiyizwile ngakho sizayilungisisa ukuze abantwana beqhubeke befunda,” kutsho uNkkz Mnguni.
Imizamo yokukhulumisana lesikhulumi samapholisa esabelweni seMatabeleland North uInspector Siphiwe Makonese yehlule ngoba ucingo lwakhe lwalile ukungena.
Induna yakule indawo uMnumzana Vusumuzi Mabhikwa ebuzwa ngale indaba uchaze ukuthi seyizwile njalo yaqala kudala.
“Indaba yokuvalwa kwesikolo seMlamuli ngiyizwile njalo iqale kuthemu ephelileyo.
Ngizwile njalo ukuthi kulezakhamizi ezibotshelwe ukukhipha abantwana esikolo ngenxa kamphathisikolo lo,” kuphetha induna uMabhikwa.
