uMthunywa
Cornelius Luphahla
IZAKHAMIZI zelokitshini leNjube edolobheni lakoBulawayo zikhala ngebhutsha ekule indawo okucatshangelwa ukuthi ithengisa inyama engahlolwanga njalo eyonakeleyo.
Ibhutsha le kubikwa ngekaMnumzana Zebedia Ndlovu oyisakhamuzi kulelilokitshi okucatshangelwa ukuthi uthenga inyama yenkomo ezizifeleyo ayeyingenisa ngudlu ebhutsha yakhe ayithengisele izakhamizi osokudale ukuthi izakhamizi zikhonone zithi kayivalwe ibhutsha yakhe.
Kuzwakale ukuthi indaba yokuthi uMnu Ndlovu uthengisa inyama engekho emthethweni njalo engahlanzekanga, ivezwe nguMnumzana Felix Ncube okunguye owayevame ukuthenga kuye inkomo lezi ethi uyazinika ingwenya zakhe azifuyileyo kanti uzisa ebhutsha yakhe.
UMthunywa ukhulumisane loMnumzana Felix Ncube oyisakhamuzi esigabeni seMaheba, eSolusi wachaza ukuthi uMnu Ndlovu uyake athenge kuye inkomo kodwa wayengazi ukuthi wenzela ukuyathengisela abantu inyama engasalungelanga ukudliwa ngabantu.
“UNdlovu uhlala ethenga kimi inkomo ethi uyazipha ingwenya zakhe eziseVictoria Falls yena esazi ukuthi ufuna ukuyathengisela abantu. Okokuqala wathenga umkhono lomlenze wahamba lawo wangipha sibili imali yakhona.
“Manje okwenza ngananzelela ukuthi inyama le uyabe esenzela ukuyayifaka ebhutsha yakhe yikuthi emavikini amabili adluleyo wazothenga inkomo yami ebiqamukile ingahambi. Wayithwala-ke wahamba layo engangiphanga imali ngathi sengimbuza ngemali yami wathi inyama kayithengwa ebhutsha yakhe. Ngahle ngabona ukuthi ngeqiniso uhlala ethengela ukusa ebhutsha,” kutsho uMnu Ncube.
Esinye isakhamuzi sakule indawo uMnumzana Simon Nkomo uveze ukuthi kuliqiniso ukuthi uMnu Ndlovu uthengisa inyama engahlolwanga ngoba akuvamanga ukuthi abonakale efaka inyama ebhutsha yakhe.
“Mina ngiyakholwa sibili ukuthi uNdlovu uthengisa inyama engekho emthethweni ngoba kabonakali efaka inyama ebhutsha kodwa uthola sokulenyama kuphela ekuseni. Lokhu kuveza ukuthi inyama le uyifaka ebusuku esenzela ukuthi abantu bengaboni ukuba uthengisa inyama engahlolwanga,” kutsho uMnu Nkomo.
UNkosazana Sipho Moyo oyisakhamuzi kulelilokitshi uveze ukuthi wathenga inyama eyonakeleyo kule ibhutsha wayibuyisela, yikho engasathengi khona.
“Mina sengathenga inyama kathathu kule ibhutsha ngiyibuyisela ngoba yonakele. Lokhu akwenziwa yimi ngedwa ngoba ngiyake ngithole abanye bezoyibuyisela njengami. Ngalokhu sengabona kungcono ukuthi ngingasathengi khona isitshebo ngiyethenga kwezinye indawo.
“Okubuhlungu yikuthi nxa usuyibuyisela inyama le izisebenzi zakhona ziyatshinga zithi usuyifakeni inyama yazo,” kutsho uNkszn Moyo.
Ebuzwa ngale indaba uMnu Ndlovu walile ukuthi uthengisa inyama engekho emthethweni wathi kuyabe kungelamagetsi yikho inyama isonakala.
“Mina kangithengisi nyama engahlolwanga kodwa okwenza abantu bayiphendukise inyama yikuthi emavikini adluleyo bekutshe i-transformer yamagetsi ngakho inyama ibinganhle ngoba bengiyigcinisa endlini yesinye isakhamuzi. Okunye njalo okwenza abantu bethi kangivamanga ukuhlaba inkomo yikuthi inyama ngiyithenga ngeziqa kulezinsuku ngoba kayithengwa.
“Lokhu okukhulunywa nguNcube akusoqiniso ngoba inkomo zakhe ngingaze ngizithenge kangizifaki ebhutsha yami.
Okwakhathesi uzondele ukuthi kangikamuphi imali yakhe yenkomo le engiyithenge kathesi,” kuphetha uMnu Ndlovu.
