uMthunywa
Khanyile Ndebele
KULEXHEGU leChivhu esigabeni seRunoza ngaphansi kwenduna uShindi elikhame umntwana oleminyaka eyisithupha yokuzalwa wafa ngemva kokumthola esidla imfe emasimini akhe.
Umetheswacala uAphios Gwatirenda oleminyaka engu-71 yokuzalwa ngaphansi kukamlisa uGororo kubikwa ukhame uBlessing Charamba (6) mhlaka 4 Mbimbitho waze wafa ngemva kokumthola etshontsha imfe ensimini yakhe.
Kusitatimende samapholisa esisebulenjini kubikwa uBlessing labangane bakhe abathathu bathi bevela butha inkomo zabo bangena ensimini kaGwatirenda batshontsha imfe andubana abafice wabagijimisa wenelisa ukubamba uBlessing ahle wamkhama waze wafa.
“UGwatirenda wathola uBlessing Charamba labangane bakhe ababevela dinga inkomo egangeni bafika ensimini yakhe batshontsha imfe emasimini akhe.
Kubikwa uGwatirenda wagijimisa laba abathathu wabamba uBlessing amkhama wambulala wamtshiya egangeni.
Uveze ukuthi abanye abantwana bafika babikela abazali babo ngokwakwenzakele okwenza benelisa ukuyathola isidumbu sakhe egangeni.
Ngelanga elilandelayo ekuseni abazali baka Blessing baziswa ngokwakwenzakele bahamba kuleyo ndawo bamthola esedlule.
Isidumbu sikaBlessing sahamba sayahlolwa kwavela ukuba usweleke ngenxa yokuswela umoya ngesikhathi ekhanywa.
Isikhulumi samapholisa eMasvingo uInspector Kudakwashe Dhewa uthe indaba le isisemthethwandaba.
UGwatirenda umiswe phambi komthethwandaba weChivhu mhlaka 9 Mbimbitho njalo ukhangelelwe ukuphenduka emthethwandaba ngemva kwensuku ezimbalwa.
