uMthunywa
Thokozile Mbedzi
KULEXHEGU elileminyaka yokuzalwa engu-70 leFairview V ePlumtree eligalule lithiya inhlanzi edamu leKariba ngeviki ephelileyo.
Kubikwa uEmmanuel Mudzingwa ubethiya inhlanzi eKariba Dam eFairview iwuka yasiginywa yinhlanzi yena wasebophela amagalani ama-5 litres amabili ekhalweni wantsheza ngawo.
Ekhuluma lentahteli kaMthunywa uMnumzana Rafayeli Mathe omunye walabo ababethiya labo kwelinye icele uthe lokhe betshe amathe ngesimanga esenzakeleyo.
“Lokhe ngilesimanga ngendlela uMudzingwa agalule ngayo ngoba ukwenze kwaba sabhayisikopo okokuthi akula loyedwa owayecabanga ukuthi kungacina sokulesidumbu phansi.
“Inhlanzi iginye ihuka yakhe kwamcunula wasethatha izigubhu zama-5 litres wazibophela eqolo weqela emanzini. Angazi ukuthi lapha ekungeneni kwakhe emanzini kusuke kwathini ngoba sibone esesehluleka ukuntsheza esegalula.
“Umngane wakhe uthe ebona lokhu laye uhle weqela emanzini wamkhupha kodwa umphefumulo ubuvele usuphumile,” kulandisa uMnu Mathe.
Isikhulumi samapholisa esabelweni seMatabeleland South uChief Inspector Philisani Ndebele ebuzwa ngondaba lolu uvumile wathi abantu akumelanga bathiye inhlanzi okungekho emthethweni.
