uMthunywa
Ncekwenhle Ncube
ISIDLELA egilweni enye imuli yeSpaza eMlomoliwodo kuWadi 5 nanko phela izindlu sezileviki zithunqa kungaziwa ukuthi umlilo uphenjwa ngubani.
Umuzi kaMnumzana Henry Malunga ohlala ngaphansi kukasobhuku uNkosikazi Dainah Moyo usele ungumlotha ngemva kokulavuka amalangabi alokhe eqale ngoLwesithathu kuviki esanda kwedlula.
Intathelizindaba ivakatshele kuleyondawo ngemva kokuncwetshwa udletshana ukuthi kulabotikolotshe abatshisa impahla zonke kule indawo.
Abasiki bebunda babikele intatheli ukuba unkosikazi kaMnu Malunga, uMatilda Malunga wadinga ondofa abathathu ukuze azuze imali kodwa baqala ukugila imikhuba.
“Umama lo wadinga ondofa abathathu, kukhanya wayezama ukukhulisa umnotho wakhe kodwa ondofa laba kukhanya sebexhwalile nanko phela sebebulele izifuyo kulandela ukuba inina lomuzi lifike lamanzi omthandazo.
“Kwabizwa abantu benkonzo benelisa ukukhipha otikoloshe ababili okukodwa kwabaleka, yikho lokhu osekuhlupha ngokuthungela izindlu libalele,” kulandisa umfakazi lo.
Omunye umakhelwane ovele ngokuthi nguMaNyathi ubikele intatheli ukuthi abakaze bebone imihlola enjalo lokhe babakhona kuleli.
“Kuyethusa lokhu njalo kuyamangalisa. Kwenza sengathi kuyajuma abantu. Ngesikhathi abantu besalibele kuyalvuka umlilo uqonde phezulu kutshe yonke into ekhonapho. Umlilo wakhona ucitsheka nzima. Khathesi umlilo lo suqalisile ukutshisa impahla abaziphiwa ngabantu bebancedisa,” kulandisa uMaNyathi.
UBekezela Malunga ongumntwana ubikele abacuphi bendaba ukuthi imphahla zakhe zonke zatsha kwasala umlotha wodwa qha.
“Kwatsha qhu kwasala kungumlotha. Amasofa, ingubo, omabonakude konke lombheda wami kwaphelela phakathi.
Umlilo waqala endlini yami kwehlula lokuthi sikhuphe lento eyodwa.
“Umlilo wakhona ungathi yilowu osiwubona kumidlalo yamaNigeria kubomabonakude. Uyalavuka nje wodwa egcekeni uqanse uyephezulu. Nxa uzama ukuwucitsha uqina ngamandla.
“Ngikhuluma nje lamuhla ekuseni ulumathe endlini kababa wahle waqeda konke du. Kusele okuyizinto okulutshwana esikubeke phandle nje khathesi. Nxa ungazibisela endlini zihle ziqalise ukutsha futhi,” kulandisa uBekezela.
“Kwenzakala emini libalele. Kungathi ngumuntu otshaya nge-remote ukuthi uyalayitha aphinde acitshe.
“Abadala baphume ijumo ukuthi bezame ukuyabona icebo ngoba silapha lathi asisakwazi okungavuka kusenzakala kusasa. Kungezwakala kuthiwa sekulabantu abahamba betshiswa ngumlilo,” kuchaza uBekezela.
Usobhuku wakule indawo uNkosikazi Dainah Moyo uthe isiga esinjalo sebembikele njalo njengenkokheli sebebavumele ukuthi bephume ijumo ukuze bezuze usizo ngesiga lesi.
“UMalunga wabuya ukuzongibikela mayelana ngesiga lesi esenzakala emzini wakhe. Wabuya wacela ukuthi ake aphalale ayedinga usizo kubosiyazi,” kuphetha usobhuku uMoyo.
