uMthunywa
YiNtatheli kaMthunywa
UHAMILTON Masakadza umdlali othenjiweyo kuqembu lesizwe lekhilikithi uthe amazwe adelela iZimbabwe kumidlalo yendebe yomhlaba yohlobo lweT20 azayangeka.
UHamilton ukhulume lokhu ngesikhathi iZimbabwe ilungiselela imidlalo yayo kunkezo edibanisa amazwe ekhilikithi adlala umncintiswano weT20. Inkezo le izadlalelwa kumadolobho ayisitshiya galombili emazweni atshiyeneyo.
Isigaba sama-semi-final yalinkezo sizadlalelwa enkundleni yeNew Dehli laseMumbai eIndia kuthi umdlalo wokucina uzaqhutshelwa eKolkata.
IZimbabwe ikuqula elizavula umncintiswano. Kuleliqula kulamazwe abalisa iScotland, iHong Kong leAfghanstan.
Umdlalo wokuqala uphakathi kweZimbabwe leHong Kong mhlaka 8 kuMbimbitho.
Amanye amazwe azadlala kuhlandla lakuqala lenkezo le yiBangladesh, iNetherlands, iIreland leOman.
UHamilton oleminyaka yokuzalwa engu-29 ubikele iphephandaba likazulu ukuthi yena labanye bakhe bafuna ukubonisa abalandeli bekhilikithi ukuthi bayazi abakwenzayo kulumdlalo.
Ukaputeni lo wenze isimanga kumpelaviki edluleyo ngokutshaya amabhola wafikisa i-167. Akulamdlali wekhilikithi wakuleli oseke wakwenza lokhu.
Uthe bazaqala ngokutshaya iHong Kong le New Zealand baqede lapho bahlasele eziseleyo kuhambo lwabo lokuya kuma-quarter-final.
“Inhloso yethu ngeyokuthi sifinyelele isigaba sama-quarter-final. Asesabi lutho la ngoba sifana lamaqembu wonke esizadlala lawo. Okwakhathesi siphakathi kwamalungiselelo omdlalo wethu le-Hong Kong esilethemba lokuthi sizawunqoba.
“Sisebenza gadalala silolongela ukuthi senze ubungcono bethu emidlalweni le ngoba balutshwane abacabangela ukuthi sizanqoba,” kutsho uMasakadza.
Loba umdlali lo efunga kanje, kuyaziwa ukuthi iZimbabwe iyaxega njengoba abadlali bedonse nzima kumidlalo yeInternational Cricket Council ngomnyaka odluleyo.
Iqembu elithembisa ukumphendukisa isisindo sekhilikithi kuleli ngelama-Under 19, lona elenze kahle kumqhudelwano wamazwe osanda kugqitshwa.
UMasakadza ukhangelelwe ukukhokhela ithimu ehlangene labadlali ababalisa abanye abathenjiweyo uVusi Sibanda, Elton Chigumbura, Peter Moor, Tinashe Payangarara loMalcom Waller.
Ngokudlala akwenze kunkezo yezabelo zakuleli eQueens Sports Club, abacubunguli bomdlalo bathi ulandela ezithendeni zikaGrant Flower umdlali wekhilikithi owaba ngokutshaya amabhola amanengi.
Kubikwa njalo ukuthi ukaputeni weZimbabwe ulakho ukuthi acine esedlalela ku-India Premier League, lapho okulomncintiswano ophezulu kumdlalo wekhilikithi umhlaba wonke.
“Ngizwa ngilokujabula okukhulu ukuba ngukaputeni wesizwe kulumncintiswano weT20World Cup, ikakhulu ukubangomunye wabadlali abaphethe amathemba esizwe.
“Ngifuna ukwethulela ilizwe lakithi inhlonipho, ngokunqoba emdlalweni le,” kuqhuba uTaylor.
Kusenjalo, umqeqetshi uDave Whatmore usekhethe iqembu lakhe elizancintisa.
Abadlali beZimbabwe: Hamilton Masakadza (ukaputeni), Sean Williams, Tendai Chatara, Wellington Masakadza, Tinashe Panyangara, Peter Moor, Elton Chigumbura, Sikandar Raza, Richmond Mutumbami (wk), Luke Jongwe, Tendai Chisoro, Neville Madziva, Malcolm Waller, Vusi Sibanda, Graeme Cremer loDonald Tiripano.
