uMthunywa
Cornelius Luphahla
NGENXA yokuthanda ukudla kulamanina asesithenjini athethwe yinjiva abukelise izakhamizi zeJanke eLupane ibhayisikopo yamahala kulandela ukubhulana ngomgigo kwaba luthuli bebanga ukudla okubuye lomkabo.
Impi le yenzakale ngeSonto kuviki ephelileyo lapho uNkosazana Lydia Mdlongwa avubane khona loNkosazana Sazini Moyo bebanga ifulawa (flour) letshukela okubuye lomkabo uMnumzana Jethro Siwela, uMthunywa ukuzwile lokhu.
Omunye umfakazi oqotho oxoxisane loMthunywa ngendaba le uNkosazana Lungile Mathe uthe wezwa umsindo komakhelwane kusekuseni wathola amanina la esesilwa kubangwa impahla zomkabo.
‘‘Mina ngathi ngizinathela itiye ngezwa umsindo omkhulu komakhelwane ngagijima ngaqonda khona ngathola uMaMoyo esilwa lonyanewabo uMaMdlongwa. Ngafika ngabalamula ngincediswa ngomunye umakhelwane.
“Sathi sesibabuza ukuthi babangani uMaMoyo wathi babanga ukuba uMaMdlongwa uthethe i-flour yonke letshukela.
“Isimanga yikuthi ngesikhathi besilwa uSiwela wayebukele ezihlalele emoteni yakhe. Sathi simbuza ukuthi kungani ebayekela besilwa wathi lathi kasibayekele bazwane amandla,’’ kutsho uNkszn Mathe.
Ekhuluma lentatheli uNkszn Moyo uthe yena okwamcunulayo ngesenzo sikanyanewabo yikuthi unyanewabo wathatha impahla zonke.
‘‘Mina okwangicunulayo yikuthi unyanewethu wathatha impahla zonke ezazibuye lomkethu khonapho yena emncane. Ngathi ngimbuza ukuthi kungani enze lokhu wathi mina ngiyabhayiza.
‘‘Lokhu kungicaphule kakhulu ngoba nguye owangilandayo emendweni wami khathesi sesithi ngiyabhayiza yikho ngihle ngamsukela. Ngikhuluma nje impahla abezithethe sicine sizabelana,’’ kutsho uNkszn Moyo.
Ebuzwa ngale indaba uNkszn Mdlongwa uthe impahla lezi ubeziphiwe ngumkakhe ngakho kakwazi ukuthi unyanewabo ubembangisani.
‘‘Mina impahla lezi ngaziphiwa ngumkami ngesikhathi efika ngakho ngamangala ukuthi kungani unyanewethu esilwa lami ethi ngizithathele kulokuthi akhulumisane lomkami. Lakhathesi lokhu ngithithibele ngalesisiga esangehlelayo,’’ kutsho uNkszn Mdlongwa.
UMnu Siwela ebuzwa ngale indaba uthe indaba zomuzi wakhe kazibikeli muntu angamaziyo.
“Mina indaba zomuzi wami ngeke ngazibikela umuntu engingamaziyo. Ungangifoneli futhi ngoba ngizaxabana lawe,” kuphetha uMnu Siwela.
