uMthunywa
Cornelius Luphahla
IZAKHAMIZI zesigabeni seSizinke, eLupane zincwebisana igwayi ngenye indoda ebhuqe isisebenzi sayo kabuhlungu qede yasixotsha isola ukuthi kungani sibulele igundwane ebelisendlini yayo.
Isiga lesi senzakale kuviki ephelileyo lapho uMnumzana Muzobanzi Mpala oxotshe khona uNkosazana Lindiwe Ndlovu ethi kungani ebulala impahla zahle eziqakathekileyo okucatshangelwa ukuthi wenze lokhu ezondele ukuthi ubulele igundwane lakhe ebelihlanza imali, uMthunywa ukuzwile lokhu.
UMthunywa uxhumane loNkszn Ndlovu wathi yena wabulala igundwane ethanyela uMnu Mpala wabuya etshitsha kakhulu ethi sebulele into zakhe wafika wamtshaya wamxotsha.
“Mina ngathi ngithanyela ngabona igundwane phakathi kwenkomitsho ngalitshaya ngalibulala. Okwangethusayo yikuthi igundwane leli laphuma igazi elinengi okwesabekayo ngathi ngiqeda ukulibulala wahle wathutsha uMpala etshinga ethi ngithanyela njani ngibulala izinto zakhe.
“Uthe efika wangitshaya ngempama wangikhahlela qede wathi kangisuke emzini wakhe kasangifuni. Okungizwisa ubuhlungu yikuthi wathi engixotshile njalo wangincitsha imali yami sokuze kunamuhla engangiphanga,” kutsho uNkszn Ndlovu.
UMnumzana Thabani Moyo oyisakhamuzi sakule indawo uthe isigaba sonke siyakwazi ukuthi uMnu Mpala ulegundwane elihlanza imali.
“UMpala sokusaziwa ukuthi ulegundwane okuthiwa lihlanza imali njalo zonke izisebenzi zakhe uyazixotsha zingalibona. Okwenza sikholwe ukuthi igundwane lihlanza imali yikuthi uhlala elemali enengi kodwa isitolo sakhe ayelaso sesavalwa. Kuthi kunjalo engaba lesikwelede sakho kakubhadali ngemali ukupha isifuyo okutsho ukuthi imali yakhe ilokunye.
“Njengoba uMaNdlovu walibulala igundwane leli kungenzakala ehlelwe yingozi ngokubulala igundwane leli ngoba into yomuntu ileziga sibili,” kutsho uMnu Moyo.
Ebuzwa ngale indaba uMnu Mpala uthe kuliqiniso ukuthi uyaxotsha izisebenzi zakhe kodwa yena kalagundwane njalo amagundwane wonke alegazi.
“Mina izisebenzi zami ngiyazixotsha sibili ngoba ziyabe zingalaleli imithetho yomuzi wami. Okokuthi ngilegundwane mina angikwazi njalo wonke amagundwane aphuma igazi ngakho akumangalisi ukuphuma kwegazi egundwaneni.
Okunye njalo okwenza nginganiki abantu imali nxa ngilezikwelede zabo yikuthi ngiyabe ngingelamali,” kuphetha uMnu Mpala.
