uMthunywa
Musa Janga
KULOSOMABHIZIMUSI wesigabeni sakoManoti, eGokwe obhaxabule esinye isisebenzi sakhe esisola ngokumxotshela abathengi esitolo sakhe.Usomabhizimusi lo, uThemba Chuma ubhaxabule isisebenzi sakhe esitholakale ukuthi nguMnezo nje kuphela ngeSonto, esisola ngokungaphathi kuhle ama-customer eSports Bar.
Ekhuluma loMthunywa umfakazi ongathandanga ukubethwa ngegama ubike ukuthi lindaba yenzakale ngeSonto lapho uMnezo abengakhulumisani kuhle lama-customer okucine kusenza ukuthi kuliwe.
“Okucunule uMnu Chuma yikuthi uMnezo ubetshingela abathengayo yena ekhangele. Baqale betshingelana bobabili kuthe ngemva kwesikhatshana uChuma ongumninisitolo weqela uMnezo ngezibhakela abantu ngokucwayiza kweso besebegcwele bezobukela.
“UMnezo bamtshaye waze wasala esevuza igazi emakhaleni,” kuchaza umfakazi oqotho.
Omunye ufakazi uMnumzana Nhlanhla Ncube uqhubekele phambili esithi uMnezo wenze into engalunganga ngoba vele abathengi kumele baphathwe njengenkosi kubhizimusi.
“ISports Bar leyi yiyo eyayigcwala kakhulu kodwa besebebalutshwana abangena lapho ngenxa yakhe uMnezo.
“Ama-customer yiwo enza ibhizimusi iqhubekele phambili kodwa nxa engasaphathwanga kuhle bayabaleka bayekwezinye indawo,” kuchaza mfakazi lo.
Kubikwa isisebenzi lesi sicine sibaleka sesibona ukuthi umqatshi waso uthukuthele.
Imizamo yokukhulumisana lesisebenzi esitshayiweyo kanye lomninibhizimusi yehlule ngoba omakhalekhukhwini babo bebengangeni kwaze kwafika isikhathi sokudindwa kwephephandaba.
