uMthunywa
Cornelius Luphahla
NGENXA yendlala kube yisisanasana ubukhwa bezinja esigabeni seLihlo eLupane lapho amanye amanina abhuqane kwabanzima ebanga ukuba atshontshelane imbiza ebilenkobe.
Impi le yenzakale ngoLwesihlanu kuviki ephelileyo lapho uNkosikazi Talent Mabhena abhuqane khona kabuhlungu loNkosazana Nomathemba Ndimande bebanga ukuba uMabhena utshontshe imbiza le.
UMthunywa ukhulumisane loNkosazana Sisasenkosi Mathe oyisihlobo sikaNkszn Ndimande wathi nguye owancedisana loMaNdimande ukulandela unyawo lukaNkkz Mabhena.
“Mina ngabizwa nguMaNdimande emzini wakhe wathi secatshelwe yimbiza yakhe ebilenkobe emkulwini kodwa kukhanya ithethwe nguNkkz Mabhena.
“Sasesilandela unyawo lona olwafika lwangena endlini sasesilulandela lwaze lwayafika emzini wakhe.
“Sathi sifika umkaMabhena singakamtsheli lokuthi silandeni wasithethisa wathi kasiphume emzini wakhe,” kulandisa uNkszn Mathe.
“UMaNdimande wala ukuphuma waqonda emkulwini kaNkkz Mabhena waphuma sethwele imbiza eyayisisele lobukhokho benkobe.
“Khonapho-ke bahle basukelana ngezibhakela mina ngabaleka ngayabiza omakhelwane,” kutsho uNkszn Mathe.
UMnumzana Dennis Ndlovu uchaze ukuthi yena wathola amanina la esilwa wafika walamula wasebiza usobhuku.
“Mina ngezwa kungumsindo komakhelwane ngesikhathi ngivela nathisa inkomo zami ngagijima ngaya khona.
Ngithe ngifika ngathola umkaMabhena segcwele igazi emlonyeni ngasengibalamula.
Ngemva kwalokho ngafonela usobhuku ngamazisa kwaba yinhlanhla ngoba uthe efika loMabhena efika.
“Ngaleso sikhathi yikho lapho okwavela khona ukuthi umkaMabhena utshontshe umphika kamakhelwane wakhe ulenkobe,” kutsho uMnu Ndlovu.
Ebuzwa ngale indaba uNkszn Ndimande uchaze ukuthi yena ucatshulwe yikuthi umakhelwane wakhe wahle wamthethisa yena emtshontshele.
“Mina okwenza ngamtshaya umakhelwane yikuthi wathi engibona ngiphuma ngisiyasika utshani wasala entshontsha inkobe zami lomphika ngathi sengilandela unyawo lwakhe wangithethisa wathi ngingangeni emzini wakhe.
“Lokhu kwangicaphula ngabona ukuthi uyangidelela ngasengimtshaya ngisenzela ukuthi engaphindi futhi.
Noma kunjalo kodwa sakhulumisana sayilungisa indaba le,” kutsho uNkzn Ndimande.
Usobhuku wakule indawo uMnumzana Maxwell Moyo ebuzwa ngale indaba uvumile ukuthi uyayazi wathi sebayikhuluma yalungisiswa.
“Kuliqiniso sibili ukuthi kulamanina atshayane ebanga imbiza yenkobe, kutsho ukuthi yindlala ebangele lokhu.
Kube kuhle ngoba uNkkz Mabhena uwubuyisele umphika kaNkszn Ndimande wamxolisa,” kuphetha uSobhuku uMnu Moyo.
