Uncategorized

Isikorokoza bhe esikolo

29 Apr, 2021 - 00:04 0 Views
Isikorokoza bhe esikolo

uMthunywa

Ethel Ncube
KUPHAZAMISEKE ukufunda esikolo seMaqaqeni eMbembesi kudilika egcekeni lesikolo nanko phela kubikwa omakorokoza bakule indawo sebegcwele phakathi esikolo ngoba kulodletshana lokuthi kulegolide kule indawo, uMthunywa uyakuveza lokhu lamhlanje.

UMthunywa uzwe ukuthi kumaviki ambalwa asanda kwedlula kuke kwadilikela phakathi esikolo seMaqaqeni Primary osekusenza abazali abalabantwana abafunda kulesi isikolo bahlalele evalweni.

Kuzwakale ukuba ngenxa yesenzo sabomakorokoza laba isikolo lesi sesilindwa ngamapholisa.

Esinye isakhamuzi sakule indawo esikhulume loMthunywa uNkosazana Melina Dube uchaze ukuba omakorokoza sebesona esikolo.

“Kukhanya ibhanti legolide lingena phakathi esikolo seMaqaqeni Primary kungakho omakorokoza sebebuya ngobunengi bevela endaweni ezitshiyeneyo bezodinga lelo golide.

“Okudanisayo yikuthi kabakutshayi indiva ukuthi abantwababo labo bafunda lapho lokuthi isikolo singavalwa bazafunda ngaphi bona bazinakanela nje imali,” kuchaza uNkszn Dube.

“Okwakhathesi amapholisa yiwo aselinde isikolo njalo kukhanya bangasuka abantu bayanyeya bayogebha yikho nje khathesi sebebopha labo abazama ukungena ebusuku,” kutsho uNkszn Dube.

Ekhuluma lentatheli uMnumzana Delani Moyo oyisakhamuzi kule indawo uthe impilo zabantwababo zisengozini ngenxa yabomakorokoza laba abafuna ukungena esikolo bayogebha igolide.

“Omakorokoza sebesithwalise nzima isikolo okuyinto engaba yingozi ebantwaneni ngoba bazagebha batshiye bengagqibelanga abantwana bawele kumbe izindlu zokufundela zidilikele, kubika uMnu Dube.

Intatheli ibuye yaxhumana lokhansila wakule indawo uMnumzana Vethi Tshuma ovumileyo ukuthi kulabomakorokoza asebehlupha ngoba sebeze begebha esikolo. Uthe khathesi amapholisa asesikolo ukuze babone ukuthi kuhamba njani.

Induna yakule indawo Induna uDumisani Ndondo uthe usekuzwile ukuthi omakorokoza sebegebha esikolo.

“Indaba yabomakorokoza sengiyizwile njalo ngizayichwayisisa. Uhlupho yikuthi lababantu bavele bafika endaweni bazenzele umathanda kodwa sizakulungisisa.”

Share This:

Sponsored Links