uMthunywa
Cornelius Luphahla
ZIDIDEKILE njalo zizidla amathambo engqondo izakhamizi zesigabeni seMalaba eLupane ngengubo esihluphile, ephenduka ibe ngumuntu ebusuku njalo kucatshangelwa ukuthi ibangela ukuthi odlule phansi kwayo alahleke.
Ingubo le kubikwa igaxwe esihlahleni esiseceleni komgwaqo njalo kucatshangelwa ukuthi ngeyesinye isakhamuzi sakule indawo esaziwa ngokuthi nguMaMlotshwa, uMthunywa ukuzwile lokhu. Esinye isakhamuzi esihlala kule indawo esithande ukubizwa ngokuthi nguTshuma sibikele intatheli ukuthi abantu bakhathazekile ngengubo le njalo kucatshangelwa ukuba ngeyesinye isakhamuzi.
“Ingubo le ngiyayazi njalo sokuleminyaka emithathu ngiyibona iphanyekiwe esihlahleni njalo ngizwa kuthiwa ebusuku iyaphenduka ibe ngumuntu. Ngiqalisa ukuyibona yayibomvu ngoba yayintsha kodwa khathesi ayisakhanyi ukuthi yayilombala onjani ngenxa yokunethwa lizulu lokutshiswa lilanga.
“Ngizwa kuthiwa ingubo le yasuka koMaMlotshwa labaphurofethi ayebabizile ngoba ilondofa phakathi onguye lo okucatshangelwa ukuthi usehlupha abantu abangelacala endleleni,” kuchaza uTshuma.
Esinye isakhamuzi sakule indawo uMnumzana Brighton Moyo ubikele njalo uMthunywa ukuthi yena wake wambona umuntu esihlaleni esilengubo le.
“Mina ngathi ngidlula esihlahleni lesi ngabona umuntu omfitshane egqoke ezimhlophe wasuka kulesisihlahla wazokuma endleleni. Ngithe ngibona ukuthi umuntu lo usendleleni ngaphambuka ngizama ukumceza. Isimanga yikuthi kusukela khonapho angizange ngabona ukuthi indlela ingaphi.
“Ngabhoda kusukela ngo-9 ntambama kwaze kwasa ngingayiboni indlela lokhu ngibona umuntu lo esima phambili kwami evala indlela.
“Okwangethusayo ngathi sengidiniwe ngahlala phansi ngalala, ngathi ngiphaphama ngazibona ngingaphansi kwesihlahla esilengubo le layo ithe khoxo maqondana lami,” kulandisa uMnu Moyo.
Esinye njalo isakhamuzi sakule indawo esithande ukubizwa ngokuthi nguMaNkosi sibikele uMthunywa ukuthi laso sake sambona umuntu esehla esihlahleni lesi esilengubo le.
“Lami ngake ngathi ngidlule kule indawo ngabona umuntu esehla esihlahleni lesi eqonda endleleni ngazama ukutshitsha kodwa wangiqalela wama endleleni. Manje mina angizange ngaphambuka kodwa ngazimisela ukumthuza umuntwana lo wasesuka endleleni wama eceleni ngadlula. Ekuhambeni lapha ngasengihamba nzima ngoba ngangimbona ekhanyisa phambili kwami kuthi nxa ngifika lapho ngimbone esemile endleleni, ngaze ngayafika emzini wami.
“Yikho okwenza ngavuka ekuseni ngisiyabikela usobhuku wabiza abantu labo abagcizelela ukuthi bayake bambone ngakho akudingwe abaphurofethi,” kuchaza uMaNkosi.
Kukhulunywa ngale indaba kosobhuku uMaMlotshwa uvumile ukuba kubizwe abaphurofethi bezochaza ukuthi ingubo le ngekabani.
“Lami ngiyavuma ukuthi kubizwe abaphorofethi bezokhipha ingubo le kodwa bengaqambi ukuthi ngekabani ngoba bazaxabanisa abantu,” kutsho uNkszn Mlotshwa.
Usobhuku wakule indawo uMoses Moyo uvumile ukuthi kulengubo esihluphile esigabeni.
Kulengubo ephanyekwe esihlahleni somkhosikazi esithwalise nzima izakhamizi kungakho sezivumelane njengesigaba ukuthi sidinge abaphurofethi ukuze ikhutshwe lapha,” kuphetha usobhuku uMoyo.
