uMthunywa
Trevor Mhlanga
Kanengi nxa udinwe kanje awukukhangeli ukudla, uhle uqonde ekamelweni uzithele engutsheni, kodwa kuyala ukulala ngalokhu okhangelane lakho, ubamba nhlangothi zonke ulungise majiko onke, uze uzwe amehlo esekusinda.
Lanxa ubuthongo bulinywa ngakini, uyavuka kusesemnyama, lamhla-ke lamanzi awafiki emhlane, indaba yikulungiselela uhambo.
Phandle izihlahla lomoya kwenza umncintiswano wokuhozana, uthuli lutshaya ingquzu, amatshe amancane ayaqoqodana, utshani lamaluba kutshibilika okwamantombazana edlala ibhola likamamtshayana.
Asi mayika asegqokwe la, lokuyisikhwanyana sokwetshatshwe eqolo, isibane sigqizwe ekhanda, nansiya indlela! Kubuhlungu ukuhlala esititshini.
Insuku zakhathesi azisakhethi ukuba ukuyiphi inyanga, ekuseni kulomqando osikayo othi ungahlangana lawo uhitshwe, ubanjwe ngumvimbano otshayisa ngekhanda.
Ngapha uhlezi uthe qokolo ngaphansi komsehla elitsheni elilukhuni, sezizwile izihlalo, ulokhe untshintsha inhlangothi!
Inkombalanga layo sisenza sengazathi ibanjwe ngamakhaza imizuzwanyana engatsholutho sithatha ihola lonke ukuphela.
Kulomnyama oqandisa umgogodla, indlebe zilokhu zithiye ukuzwa umdumo webhasi ngapha amadolo angumhlanga ngokwesaba, nxa ungezwa amahlamvu nje amathumbu ahle atshilane.
Kasejwayeleki isititshi kodwa akula eyinye indlela, ibhasi imela khonapho.
Ithuba eliguqula impilo yakho kumele ulithathe njengebhasi yemaguswini, la kulomgwaqo ongahanjwa zimota ezincinyane, njalo kulebhasi eyodwa, layo elensuku zokuya edolobheni.
Idolobho lingumfanekiso wephupho lakho, isifiso senhliziyo yakho, lokhu okhangelele ukuba yikho kumbe ukukwamukeliswa ngemva kokusebenza gadalala.
Ibhasi kayilindi muntu, ngendlela efanayo ithuba kalikudingi, njalo lingakufikela ungazimiselanga ukulisebenzisa liyadlulela phambili.
Isiqokoqela yikuhlala uzilungiselele ukuze nxa ufikelwe lithuba loba ngentuba engangesikhala senalithi wenelise ukulisebenzisa.
Kulendlela obona ngayo ukuba leli lithuba lokuba wenze olunye ulutho, njengoba ibhasi izwakala ngomdumo.
Umtshayeli webhasi kungenzeka abe liphakaphaka lomuntu, umqoqi wakhona abe lekhwapha elibulala imiyane, kodwa lokhu akukukhiphi ebhasini ngoba ukhangelele lapha oya khona.
Phezu kwekhwapha elinenka inhliziyo umqoqi sokungathi ngumkhuba ukuba abe ngumuntu wenkulumo enxele, athi lanxa ecela imali yetikiti akuphathe ngenhlanekela yesandla.
Lokhu kuyawuqubula umoya wakho, kodwa uyaqinisela usebhasini uze ufike la oya khona.
Yazi okukhangeleleyo kolwakho uhambo lwempilo, abanye abantu okumele bakuphathise kulokhu lalokhuya bazakuhalada, bakudlise imbuya ngothi, yazi indlela ezifaneleyo zokubhekana labo.
Funda umumo okuwo, ubone lapho okufanele ungcineke umlomo ukuze into zihambe, kukanti lapho okoniwe khona ngomlomo, akulungiswe ngomlomo kungavezwangwa zikhali zempi.
Akukufikisi la oya khona ukubamba umtshayeli ngomphimbo njalo akumenzi atshayele ngcono. Asazi kumbe kuyenza kuwe? Yahlulele lindaba ngowakho umbono, kuphumani ungathi ngokuthukuthela uyithele ingqamu evilini?
Thintana loTrevor Mhlanga kunombolo zikamakhal’ ekhukhwiniezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
