uMthunywa
Trevor Mhlanga
NGIMTSHAYELA ihlombe lo owaphuma lecebo elihle kangaka lokuthi kube lephephandaba lesintu eliletha izinto zinjengoba zinjalo ukuze kufinyelelwe uzulu. Lowo muntu owacabanga lelibizo elithi uMthunywa ngiyamhlonipha, ngoba kulibizo elikubeka obala ukuba umsebenzi waleliphepha kawuyikutshabalala. Nxa ungathunywa ukwenza okuthile ngumzali, kumbe ngomunye nje umuntu kungenzeka ubelesidensi, ukhonone, kumbe wenze uyekethisa, uzidonsa, kumbe ngokuphoqelelwa. Ikanti othunywe yimvelo kalaso isikhathi sokumotsha, wenza lokhu akuthunyiweyo ngesiphangiphangi enganaki ukuthi umphakathi uthini ngalokhu akwenzayo. Leliphephandaba linjalo, liletha ezisegudwini, ezitshisayo, ezibaba gamu, lezimnandi, kungasi kuthi abalobi balo badinga ukuthokozisa othile, kodwa kuyimvelo ebathumayo ukuba bakukhiphe kungadungwanga okwenzakala esigabeni.
Izolo abazali besakhuluma kuzwakale abantwana bebethunywa, bagijime indlebe zize zidume lenyawo ziphefumule. Wayethi umfanyana engathunywa ezitolo angatshelwa kabili lokhu okumele akuthenge, futhi wayehle atshelwe lombala wephepha kumbe igabha lalokhu okumele aze lakho. Kungaswelakala njengoba elayelwe wayebuyela ngekhaya ayobika engaqali ukuthenga loba yini ayibona ifanele. Wayengadinwa umntwana wayizolo, lanxa wayengahamba kabili kathathu emavinkilini esiyadinga into nye, yikhonje kulesaga esithi “Umthunywa kala mpontshi.” Namhla-ke abaphumelelayo kumabhizimusi abo ngabaphatha abathengi kumbe abaqatshi ngendlela efanayo abantwana bayizolo abayenze kubazali babo. Ukubezwa lokubaqakathekisa kwenza bathuthukise ibhizimusi yakho, kumbe bakuthande njalo bakuphakamise emsebenzini okuwo.
Isiphatho siqakathekile loba ngaphi, abaphathi benkonzo abangela siphatho balahlekelwa ngamakholwa, izindlu zokulondoloza ezingela siphatho ziyaswela izivakatshi. Insika yesiphatho yikuthumeka wenze ngobuso obuhlakaniphileyo langendlela esuthisayo. Njengomntwana othunywe amabele abadala, kungenzeka okunye okuthunywayo awuhambelani lakho, kodwa akumelanga indlela ozwa ngayo ngakho lokhu yazakale. Yona le indlela ofisa ukuba uphathwe ngayo, phatha abanye njalo. Umntwana ohloniphayo lothumekayo nguye njalo ophiwa akuswelayo esikolo, langekhaya. Inengi labantu likhetha ukuya esitolo thile kumbe emakethe thile, kungesi kuthi ilentengo ephansi kulezinye indawo, kodwa kuyikuthi benzelwa kuhle langezihlathi ezibalekela umlomo kulezo ndawo.
Okunye okuphawula isiphatho esihle yikuqakisa ulimi lwabantu osebenzelana labo kumbe ohlalisane labo. Abantwana balolimi lwabo abalusebenzisa nxa bebodwa labosowabo, kodwa nxa sebephambi kwabazali basebenzisa ulimi oluqondileyo. Kulolimi lwabadle amabhuku, ulimi lwabalezamba ezinkulu, lolimi lwabalenkambo, njalonjalo. Zonke lezi ndimi zinhle nxa zisetshenziswa endaweni ezifaneleyo hatshi yonkana ndawo. Ukwazi ulimi olufaneleyo lokusebenzisa endaweni efaneleyo kwenza njengetswayi esitshebeni. Akuvumi vele ukuthi lanxa kukuthuma ukuthi uye ngaphandle, bese uqonda endlini yokudlela, zikhona izindlu ezifanele wona lo umsebenzi. Yiso lesi sizatho uMthunywa elotshwa ngesintu, ukukhulisa ulimi lukazulu njalo elethwa ebantwini abayibo. Yenza njalo lawe kweyakho impilo, ube sengazathi kukhona okungaphakathi okukuthumayo, uzaphumelela ngoba uMthunywa kala mpontshi! Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
