uMthunywa
Trevor Mhlanga
NGESIKHATHI sempi impilo yayinzima kuwo wonke umuntu, amabutho abelungu ayezingela abalweli benkululeko, benjalo bezingelwa, amajaha lezintombi labo babehlomile, behamba ngeganga ukuze banqwethele abangelamadolo. Kusenjalo, kwakusenzeka ukuthi afike amasotsha kaHulumende aphoqelele abakhileyo ukuba babaphekele ukudla kubulawe imbuzi kumbe inkomo kusiya ngokuthi bafunani mzwanokho.
Abantu benkosi bathi sebekwenzile lokhu; kungakabi nsuku zatshwala abe sethelekile amagandanga, ekhalisa itabusi labanye batshiselwe imizi ngoba kuthiwa bangabathengisi. Kusenjalo, ezinye izifuyo zibulawe zidliwe, ngapha imicijo yenkafulakufa ikhombele emakhanda abantwana. Nxa litshona besaphila bathabe babe manzi te, kungenani lemvimvinya abazitholileyo.
Intokozo eyabakhona ifana leyamaxoxo lingana, mzwana kuthiwa impi iphelile. Usuku lokujabulela uZibuse, lwalungolokuthokozela ukuphumula ukuhlukuluzwa inxa zonke kubanengi. Izifuyo lazo zaphumula ukuhlatshwa, lemibhobho yaphumula ukukhala. Igusu ngokufanayo, lathi hemu ukuchithekelwa ligazi.
Kwadlula iminyaka engatsho lutho, kwasekuqala indaba yabahlamuki esabelweni saMatebele. Bahlukunyezwa njalo abakithi, kusifa inkulungwane kunyamalale amakhulu. Abaseleyo labo babedutshuzwa, bawakalwe, banenjwe, imbambo zingqikilane, lenduma zibonakale; kusila abetshabi kuphela. Lakho lokhu kwaphela ngasuku lunye, selilotshiwe iphetshana elitsho ukubambana. Injabulo eyaba lapho kwangathi ngabantwana abathengelwe iziwiji, kuthatshelwa impilo zwi!
Umuntu ofanayo, olahlekelwe yizifuyo, losowabo owatshiselwa umuzi, lalowaya olahlekelwe yizihlobo kabazange bakhunjulwe. Bangcono abaya empini ngoba uHulumende wokuzibusa wake wabakhumbula, bayihola ngengwane ethengayo. Laba bantu abahlukumezeka kangaka ngesikhathi sempi, langemva kwayo kabazange bakhunjulwe, kodwa lokhu akubanga yimbangela yokuthi baswele ukufunda, ukusebenza, kumbe ukuqala amabhizimusi.
Kabazange balindele ukuholiswa nguHulumende okuthile, kumbe ukubhadalwa lezo zifuyo ezadliwayo, kodwa lamanje, bakhona abanengi babo lokhe beziphandela njengenkukhu ezidla ziziphandela. Bakhona njalo ebantwini abafanayo abalokhu behlaba umkhosi ngamanxeba okulinyazwa khonale eminyakeni engaba ngamatshumi amane eyadlulayo.
Okunye ohlangana lakho empilweni akumnandi, futhi kakukufanelanga; uphathwa kubi ungonanga lutho. Lapho-ke, kumele ukhethe, ukuhlala phansi uzikhothe amanxeba kumbe ukusukuma uqhubeke ngempilo. Lokhu akutsho ukuthi kumele uyeke bekuhlukuluza uzithulele, kodwa amandla akho onke kawangapheleli kuzolo eloniweyo uze ukhohlwe ukuphila namhla lokulungiselela ikusasa.
Nxa ungalonda imbali yakuleli ethintwe kancinyane lapha uzananzelela ukuthi akulula ukuthola inkululeko lokuthula. Ungathi ngokuswela lokhu uchithe isikhathi ucabanga ngobunzima obubonayo, bukuncitshe ubuthongo, kodwa ungela cebo. Ubuhlungu obuzwayo abukuphe intshukuntshuku yokuzingconoza, bukukhuthaze ukulambela impumelelo. Bambisisa lokhu, ukuhlupheka kumbe ukuhlutshwa, kumbe ukukhahlanyezwa akukususi kuhambo mpilo, ngoba kungelani lokuthi kuyini okukuweleyo, lokhe usaphila!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
