uMthunywa
Trevor Mhlanga
“HLALA phansi uchume, zibambe, wena . . . wena!” La ngamazwi phose wonke umntwana oseke wawatshelwa; akula nto enzima njengokuchuma phakathi kwabantu. Nxa ukhangele amehlo abemzini ngekhaya, uzwa inyawo ziluma, kusithi weqayeqe bakubone ukuthi lawe ukhona.
Kungalethwa ukudla, lokhuya okukulumayo kuyakunyenyezela ukuthi uthalathalaze emiganwini yezethekeli. Usathi uyaphakamisa amehlo, uhle uhlangane lelihlo elibomvu elilenkulumo.
Nxa zisebenza ezakho uhle uphumele phandle uyelindela ukuphiwa okwakho ukudla. Wonke umzuzu odlulayo uba sengazathi lihola emva kokubona abanye bephiwa izilololo wena ungakadli. Uyageza izandla uziphinde uze ukhulekele lokudla kwakhona kungakafiki.
Isimo okuso manje sibuhlungu ngoba loba yini oyenzayo kayiphangisisi ukufika kulokhu okuqapheleyo, okwakho yikulinda nje!
Ngabe ukulinda kufana lokupheka ngabe lo olindileyo uyayikhwezela imbiza ivuthwe ngokuphangisa, kodwa akunjalo. Okubuhlungu kakhulu yikulindela into oyikhangeleyo kodwa ungela mandla okuyifinyelela njengenkomo efakwe isayeka.
Kulezinsuku phose wonke umuntu ufika endaweni lapho okumele alinde khona. Ungagula uyalindela ukubonwa ngumelaphi, qede ulindele imota ezakusa ngekhaya.
Ukuze uthole imali ebhanga uyalinda imizuzu thize usemzileni, lakho nxa usuyisebenzisa leyo mali uyangena kolunye udwendwe lwabathengayo. Indaba yethu lamuhla ayikho ekubaliseni indawo esilinda kuzo, kodwa ekuqapheliseni okwenziwayo nxa umuntu elindile. Omunye uyazilibazisa ngesikhathi esalindile acine sekhohlwa okuyikho akulindeleyo.
Kakho othi efuna ukugada ibhasi ayeyilindela ebhanga, okutsho ukuthi lawe ngezake ukhangelele ukuthola okufunayo ukulindele endaweni engayisiyo.
Abalindele ukuza kukaJesu babonakala ngokuya enkonzweni, befunda ngendlela zokuziphatha ukuze bamamukele ngentokozo. Wena ulindele lelo thuba ongalisebenzisa ukuzibeka ezingeni elingcono lempilo, wenzani?
Khangela esititshini sebhasi, ekuseni emathathakusa, izakhamizi ziyabe sezihlezi, umphako sulungisiwe, iziqhuma sezibotshiwe zalotshwa amabizo abaninizo, zaqoqwa ndawonye.
Nxa umdumo ungezwakala wonke umuntu uthi khwimilili abale iziqhuma zakhe njalo, ithi isithi ntsi, kube yisiphangiphangi sekugijinyelwa indawo phakathi. Otholakale elalise inkophe, sokungenzakala aswele indawo, kumbe ibhasi isukume ezinye iziqhuma zingakakhwezwa.
Kungenzakala lakuwe ukuthi unanzelele sulitholile ithuba ukuba ubungalilindelanga ngokupheleleyo. Funa sikhona isiqhuma senhlanyelo okululwazi esisileleyo, kumbe yimali yokubhadala ibhasi okungamandla adingakalayo ongelayo.
Okwenza kube njalo yikuthi ubuhlungu bokulinda kwesinye isikhathi bukwenza ufake ingqondo wakho kukho, kulokuzilungiselela lokhu okulindeleyo.
Kwesinye isikhathi kubakhona okunye okuthathekisayo okususa umcabango kulokhu ongakho, utholakale ungasekho lapho okumele ubekhona. Lakwesinye isikhathi yikudinwa nje yinto ezinenginengi ezikhathazayo, kuze kuthi nxa sekumele kukulungele ungabi lawo umdladla wokweqela ithuba elizayo. Kakungabi lanto lanxa sekutheni ekususa kokulandileyo esititshini sebhasi!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
