uMthunywa
Fungai Muderere
AMAVIKI amabili elandelana, iDynamos isiyalwe ngabadlali ababili.
Kwaqala ngoKhama Billiat, khathesi nguKudakwashe Mahachi.IDynamos ibibafuna ngamehlo abomvu abadlali bobabili.
UBilliat, njengokubika kwephephandaba likazulu usengumdlali weYadah Stars. UMahachi uthengwe liqembu leManica Diamonds.
Kubikwa usayine isivumelwano seminyaka emibili leqembu leli.
Abasiki bebunda bancwebe intatheli indlebe ukuba iDynamos yayisilungiselele konke ukuthi ithenge uMahachi, kodwa lumdlali wakhetha ukuthi aqonde eMutare ngoba kulemali engcono.
“UMahachi loBilliat ngabangane uqobo. Kuthe ngokuvela kombiko wokuthi uBilliat usesayinwe yiYadah, uMahachi laye uhle wathi ngeke alugxobe kuDynamos. Eqinisweni yikuthi uthole imali ephezulu kuManica Diamonds,” kubika umfakazi wodaba oseHarare.
Iphephandaba likazulu liyakuveza ukuba iDynamos yaba liqembu lokuqala ukuncenga uBilliat loMahachi.
UBilliat uza kuleli ngemva kokwehlukana leKaizer Chiefs ngesizini edluleyo. UMahachi ubedlalela iMeadema SC eGhana.Wazakhela udumo kuleli kumaqembu abalisa iHighlanders leChicken Inn andubana ayeqhelisa umdlalo kweleSouth Africa.
IDynamos ibithembele kubadlali bobabili. IYadah Stars yabika ngeviki edluleyo ukuthi kayisoze imboleke enye ithimu uBilliat.
Kumalungiselelo esizini yalonyaka, iDynamos isizame ngamandla ayo wonke ukuthi ikhombise ingcitshi zabadlali. Izame ukukhombisa u-Obriel Chirinda yathathelwa yiNgezi Platinum Stars.
IDeMbare iphakathi kokubumba iqembu eliqinileyo ngoba izancintisa kumqhudelwano weConfederation of African Football kulisizini.
