uMthunywa
Nontobeko Sibanda
KUNKEMENKEME yendaba eyenzakale elokitshini leDulibadzimu eBeitbridge, izakhamizi zibuthane zatshaya enye indoda yafa ngemva kokuthi ibanjwe itshontsha kwenye indlu.
Indoda le, uTapiwa Sydney Magura (35) kubikwa ebusuku bamhlaka 18 Nkwenkwezi waqansa ngophahla lwendlu, wenelisa ukuthi angene phakathi, engazi ukuthi umnikazi usakhangele.
Esizwa ukuthi usengenelwe yisigebengu, umninimuzi lo wazama ukulwisana laye. Ngokubona ukuthi isela laliza mehlula, wacela ezinyaweni wadinga usizo kubomakhelwane, abaphanga beza lezikhali batshaya ngazo uMagura.
Isikhulumi samapholisa esabelweni seMatabeleland South uLoveness Mangena uthe udaba baluphethe njalo kusadingisiswa ngokwenzakalayo.
“Udaba siluphethe. Kwenzakala mhlaka 18 Nkwenkwezi ngehola lesibili ekuseni, eDulibadzimu, eBeitbridge. Umufi nguTapiwa Sydney Magura oleminyaka engu-35, odabuka eDulibadzimu. Umufi wafika endlini ethile ngesizatho sokuyantshontsha kodwa umnikazi wendlu wayengalalanga.
Wafika weqa wangena egumeni andubana angene ku-ceiling eyamenza wayangena endlini yokulala,” kutsho u-Insp Mangena.
“Umnikazi wendlu wavuka ezama ukuthi alwisane laye kwahle kwabangela ukulwa phakathi kwabo.
Umnikazi wendlu wenelisa ukuthi avule umnyango acele uncedo kubomakhelwane abenelisa ukumbamba baqala ukutshaya uTapiwa besebenzisa izikhali ezingaziwayo.
Bamtshaya bamtshiya waya lapho ahlala khona. Umngane kaTapiwa abahlala bonke wananzelela ukuthi kaphathekanga kuhle emzimbeni wadinga imota yokuthi imthwalele esibhedlela. Ithe isiyafika imota le, wayesedlule emhlabeni.”
U-Insp Mangena uthe udaba lwabikelwa amapholisa. Isidumbu sahanjiswa eBeitbridge District Hospital ukuyahlolwa.
Amapholisa akhuthaze uzulu ukuthi angafaki umthetho ezandleni zakhe ngoba kulicala.
“Sikhuthaza uzulu ukuthi angafaki umthetho ezandleni zakhe, kodwa asebenze ndawonye lamapholisa ukuze umthetho kube yiwo othatha izinqumo. Uphenyo lusaqhubeka ngakho-ke, bazakwetheswa icala lokubulala,” kutsho u-Insp Mangena.
