uMthunywa
Thokozile Mbedzi
KULENDODA yeBeitbridge ebivakatshele kwabozala ehluleke ukutshiya umkhuba wayo wobusela yatshontsha imbuzi zakwabozala okubangele ukuthi ibotshwe ngemva kokubanjwa xhaka.
Indoda le, okutholakale ukuthi nguLovemore nje kuphela evela esiqintini seSwereki kubikwa ibivakatshele kwabozala koMikiyele Mkhomu esiqintini seMasera ize ibanjwe iqhuba imbuzi ezintathu kanye lemvu eyodwa ebisizitshontshile.
Kubikwa umetheswacala wathi efika kwabozala wamukelwa kuhle kodwa idlozi lakhe lobusela lithe selimfikele watshontsha imbuzi kanye lezimvu.
Omunye wabomakhelwane okhulume loMthunywa uNkosazana Maria Tlou uthe bazwe sokukhulunywa ukuthi kulembuzi ezinyamaleleyo.
“Thina sasisekhaya lapho esezwa kuthiwa kulembuzi ezinyamaleleyo yikho ukuhamba kwabafana besiyancedisana labanye ukudinga kanti badubeka nje ngokudinga umkhwenyana wabo nguye osezitshontshile.
“Mina ngibona angathi bakhona esihlezi labo lapha esigabeni asebenzisana labo ngoba zihlala zitshontshiwe abantu bekhala njalonje,”kulandisa uNkszn Tlou.
Esinye isakhamuzi salapho uLovemore ahlala khona eSwereki, uMnumzana Rihone Muleya, uthe uLovemore uvele ulisela abantu bonke esigabeni bayamazi, nxa bangacatshelwa zimbuzi bahle bagijimele khona ukuyakhangela emzini wakhe.
“ULovemore sakhelane laye khonapha kithi eSwereki imizi yakibo ngeyamaTshangani yikho lapho okulabazali bakhe lomuzi wakhe. Khathesi ukuyatshontsha khatshana ngabona ubecabanga ukuthi njengoba kukwabozala akula muntu ongamcabangela.
“Lapha sesimazi ulamacala amanengi okutshotsha imbuzi uyaziwa kakhulu akusethusi lanxa eseze wayatshontsha kwabozala,” kutsho uMnu Muleya.
Omele isikhulumi samapholisa esabelweni seMatabeleland South, uAssistant Inspector Loveness Mangena, ebuzwa ngodaba lolu uthe alukafiki ewofisini yabo kodwa uzaludingisisa lapho olwenzakale khona.
“Udaba lwendoda etshontshe imbuzi belungakafiki ewofisini yethu kodwa ngizaludingisisa lapho olwenzakale khona,” kuphetha uAsst Insp Mangena.
