uMthunywa
Wayne Ncube
KULESALUKAZI seSomgolo eLupane okubikwa satholakala sizulazula emangcwabeni phakathi kobusuku kwasekubizwa abaphurofethi ukuthi bazosikhulekela, kwavela ukuthi silexoxo esilisebenzisa ukuziguqula sibeyintombi nxa sesisiyathakatha.
Intatheli kaMthunywa ixhumane lesinye isihlobo sikagogo lo owaziwa esigabeni ngelokuthi Ndindiwa Nyoni kumbe NaMtshova, uNkosazana Thelma Dube wathi njengomdeni bahlala becabangela ugogo ukuthi kukhona alakho okungalunganga.
“Kulesikhathi lapho esathola okwakusazandla zabantwana esikhwameni sikagogo sambuza ngakho wavuma wathi ngezakhe. Lokhu kwasethusa njengomdeni sayihlalela phansi lindaba.
“Ukuthi watholakala emangcwabeni akungethusi kakhulu ngoba ugogo uhlala elezihlahlakazana endlini ezingaqedakaliyo.
“Ukuza kwabaphurofethi kwaveza ukuthi ugogo ulexoxo alisebenzisa ukuziguqula abeyintombi njalo lokhu angikulanduli, kungabe kuliqiniso,” kutsho uNkszn Dube. Uqhubekele phambili wathi kuke kwaba lendaba lapho izakhamizi ezathola ugogo lo ezulazula emangcwabeni okuyinto eyasolisa abantu abanengi indaba yacina ifika kuMvidigo uJoel Ncube onguye othonisisa amacala.
Ugogo uNaMtshova katholakalanga ngesikhathi intatheli zifuna azikhulumele ngendaba lezi eziqonda ukumsola, ngoba ubeyehola ukudla kwenye indawo.
UMvidigo Ncube uqale ngokwazisa intatheli ukuthi indaba le eyokutholakala kukagogo uNaMtshova emangcwabeni ayikahlalelwa edale.
“Akusindaba ethathwa lula le ngakho izikhamizi zifuna ukwazi ukuthi ugogo uNamtshova wayedingani emangcwabeni aze atholakale khona ngakho vele njengenjwayelo yomthetho wedale kumele ahlawule,” kuphetha uMvidigo Ncube.
Ekhuluma lentatheli uMaDlamini onguye owabizwa ukuthi azokhulekisa ugogo ngalindaba uthe ngokumkhulekela ugogo lo kuvele ukuthi ulomuthi omkhulu omenza aziguqule abeyintombi.
“Ugogo uNdindiwa Nyoni uveze phambi kwethu ukuthi yena uyaziguqula indlela abukeka ngayo nxa sekumnyama abeyintombi kanobutsha ebukekayo.
“Ugogo uthe yena uyathanda ukuhamba ebusuku eseyintombi yikho nje elexoxo elimgququla abemutsha.
“Uthe uyahamba endaweni zokuzithokozisa eseyintombi ahlangane labafana abancane njalo kakuphikanga ukuthi lokhu akwenzayo akuvunyelwa kuyibuthakathi, kodwa akusikho kodwa lokhu akuvezileyo ngoba kuphinde kwavela ukuthi ulezandla zabantwana azigcinileyo.
“Samkhulekela ugogo njalo ngiyethemba umoya wobuthakathi akade ukuye usuphumile” kutsho umphurofethi uMaDlamini.
