uMthunywa
Cornelius Luphahla
ZIKHUZA imihlola izakhamizi zesigabeni seTokwana ePlumtree nanko phela kulesalukazi sakule indawo esihlala sihlaba umkhosi sigijima sibaleka sithi kulomuntu ositshayayo kodwa isimanga yikuthi kubonakala inswazi zodwa umuntu wakhona engabonakali.
Isalukazi lesi, uNkosazana Silindeni Sibanda sesilenyanga ezimbalwa isikhala ngokutshaywa ngumuntu esimbonayo ngoswazi kodwa abantu bengamboni lowomuntu.
Izakhamizi ezikhulume loMthunywa ziveze ukuthi zicabangela ukuba uNkszn Sibanda angabe etshaywa ngotikolotshi njengoba kungabonakali muntu ephethe uswazi lolu.
Kuzwakale ukuthi uNkszn Sibanda waqalisa ukukhala ngokutshaywa lokhu ngemva kokuphelelwa yimuli yakhe okuyikho okwenza abantu bathi yaqedwa ngotikolotshi laba. UMthunywa uxhumane loNkosazana Anele Ncube walandisa ngokutshaywa kwesalukazi lesi ethi kalankani ngale indaba ngoba kakubonakali okusitshayayo.
“UNkszn Sibanda ubonakala nsukuzonke ezitolo egijima ethi utshaywa ngumuntu kodwa isimanga yikuthi abanye bathi bayabe bebona uswazi lodwa luphakama kodwa bengaboni ukuthi utshwaywa ngubani. Lokhu kuyethusa kakhulu ngoba kasikaze sikubone esigabeni.
“Indaba le yaqalisa ngesikhathi esebhujelwe ngabantwabakhe bonke bobahlanu, asazi kumbe babebulawa ngutikolotshi lo omtshayayo yikho esemtshaya ngoba eseswele ongambulala,” kulandisa uNksz Ncube.