uMthunywa
Langelihle Moyo
KUDABA olutshwaqisa umzimba, amapholisa eNkabazwe adinga ongabe elolwazi lomuntu owabulala isalukazi seGweru esileminyaka yokuzalwa engu-94 ngokusigwaza amanxeba amane andubana azame ukutshisa isidumbu.
Isehlakalo lesi senzakala mhlaka 17 kuyonale inyanga eRidgemont, eGweru ngehola lesibili emini.
Kuzwakale ukuthi elinye ilunga lomphakathi elalisedlula duzane lomuzi kagogo lo wathi ebona usitsha kazange aphozise amaseko wahle wagijima wabiza omakhelwane ecela uncedo lokucitsha umlilo lo.
Omakhelwane baphanga bafika bafonela amapholisa lalabo abacitsha umlilo baphangisa bafika.
Isikhulumi samapholisa uInspector Emmanuel Mahoko uveze ukuthi ngemva kokucitsha umlilo kwatholakala isidumbu sowesifazane endlini yokuphumula sembeswe ngeziqephu zama-asbestos.
“Ekuhlolisiseni isidumbu amapholisa ananzelela ukuthi sasilamanxeba amane okugwaza emzimbeni. Amanxeba la ayengaphansi kwenkaba lasentanyeni.
“Ngemva kokuhlolisisa amanxeba la yikho okwaletha insolo lokuthi sinakanele ukuthi ukhona olesandla ekufeni kwesalukazi lesi ngaphambili kokuthi atshise indlu. Kwatholakala ukuthi isidumbu lesi ngesikaRegina Muzanenhamo (94) obehlala eGweru eRidgemont kuBuggies Road.
UInsp Mahoko ucele ongaba lolwazi lokuthi ngubani owenze isihluku lesi.
uInspector Emanuel Mahoko
“Sicela ongaba lolwazi kumbe udletshana ngomuntu oyenze lesisehlakalo azise amapholisa aseduzane laye,” kutsho uInsp Mahoko.
Kusenjalo kulendoda yeMberengwa esigabeni se9C Hibbo okubikwa yabulawa isetheswa icala lokukhombisa umfazi wenye indoda.
Kubikwa mhlaka 26 Nhlolanja emini enkulu, uEmmanuel Manhanga oleminyaka yokuzalwa engu-29 wayezihlalele emzini wakhe labantwabakhe ababili. Kwafika amadoda amabili uAbel Hlanya loTafadzwa Mhlanga abaleminyaka yokuzalwa engu-23, abahlala kuleso sigaba.
Kuvele ukuthi ababili laba bafika bamethesa uManhanga icala lokukhombisa umkaHlanya. Kubikwa ababili laba bamhlasela uManhanga waze wabaleka emzini wakhe njalo kusukela ngalolosuku ahlaselwa ngalo kazange aphinde abonakale.
Kuthe mhlaka 18 kuyonale inyanga ngehola lesibili emini kwabonakala isidumbu sikaManhanga emadlelweni ngabafana ababelusile bahle bayabikela abadala.
Isikhulumi samapholisa uInspector Emmanuel Mahoko uthe udaba lolu lusezandleni zamapholisa njalo abetheswacala sebesezandleni zamapholisa bancedisa ekuchwayisiseni kodaba lolu.
“Sithanda ukukhuthaza uzulu ukuthi asixazululeni ingxabano ngokuthula hatshi ukusebenzisa udlame,” kuphetha uInsp Mahoko.
