uMthunywa
KULESALUKAZI selizweni leRussia esesiveze ukuthi sabulala abantu abalitshumi lanye sabadla.
UTamara Samsonova (68), kukholwa ukuba wabulala abantu laba kuminyaka engamatshumi amabili edluleyo.
Isalukazi lesi kubikwa besibhala konke ebesikwenza ebhukwini laso lemfihlo (diary) ebesiligcina khonale eRussia phakathi kwezingwalo esikhuluma ngobuthakathi kanye lezokutshaya amathambo.
Isalukazi lesi sibotshwe ngemva kokubanjwa ngomabonakude beCCTV bucwadlana lendlu yakhe eSt Petersburg sikhipha isidumbu siphakathi kwepulastiki emnyama.
Abacuphi bakholwa ukuthi isalukazi lesi esake sasebenza ehoteleni sasisidla izitho zomzimba zabantu esasibabulala.
Kucatshangelwa njalo ukuthi umbulali lo, engabe wabulala uValentina Ulanova (79) ngokumnika amaphilisi amanengi andubana amqume ngesaha ephila.
Isidumbu sika-Ulanova sitholakale eduze lexhaphozi emgwaqweni obizwa ngokuthi yiDimitrova eSt Petersburg singelakhanda okwenze uSamsonova wavalelwa esitokisini.
Kucatshangelwa ukuba umetheswacala wabulala umuyi ngemva kokuxabana bebanga amankomitsho ayengageziswanga.
Kucatshangelwa njalo ukuba uSamsonova wabulala umkakhe andubana abikele amapholisa ukuthi kabonakali ngomnyaka ka2005.
Ibhuku likametheswacala lapho ayebhala khona imfihlo ngempilo yakhe lilendaba ezihlasimulisa umzimba okugoqela indlela abulala ngayo elinye iloja ayehlala lalo.
“Ngemva kokuvalelwa ejele, utshele intatheli ukuthi: Bengisazi ukuthi lizabuya . . . Kuyangiyangisa lokhu, idolobho lonke lizakwazi ngami.”
Umehluli kucala leli uthe: “Ngicelwe ukuthi ngikubophe. Uthini ngakho?”
Umetheswacala waphendula wathi, “Zikhethele nkosi, mina ngilamacala njalo kumele ngijeziswe.”
Esizwa ukuthi uzavalelwa esitokisini umsolwa uqakeze izandla wahlekelela.
Elinye ipholisa liveze ukuthi lanxa umetheswacala evuma ukuthi ubulele ngeke bambambe ngamandla ukuthi achaze lapho okulekhanda likamuyi. — Ubulembu
