uMthunywa
Kuviki ephelileyo sichazile ukuthi siyini isabizwana. Siqhubekele phambili satshengisa imihlobo yesabizwana.
Phakathi kwayo sichaze isabizwana soqobo. Lamhlanje siqala lapha ngokutshengisa ukuthi sakhiwa njani isabizwana soqobo.
Isabizwana soqobo sakhiwa ngokuhlanganisa isivumelwano senhloko, lesakhi sesabizwana u “o” lesiqu –na.
Isibonelo: l(i) + o + -na = lona. Z(i) + o + -na = zona. U- + o + -na = wona, i- + o + -na = yona, a- +o + -na = wona.
Uma isivumelwanno senhloko singungwaqa lonkamisa siye sihlangane lesakhi besekusithi unkamisa wesivumelwano asuswe adedele indawo isakhi u “o”. Isibonelo: s(i)- +-na = sona, k(u)- + o + -na = kona.
Uma isivumelwano senhloko singunkamisa siye sihlangane lesakhi besekusithi unkamisa oyisivumelwano uguquka abengusingankamisa ngokufaneleyo.
Isibonelo: i- o + -na = yona, u- + o + -na = wona.
Ukusetshenziswa kwesabizwana emtshweni. Ngizaqamba ezinye zakhona sibuye siziphutshise kuviki ezayo.
Isabizwana singandulela ibizo emtshweni. Uma sisebenza kanje siyabe sigcizelela ibizo. Izibonelo: Bona abantu bahlakaniphile.
Lona uluthi luqamukile.
Isabizwana singasebenza silandele ibizo emutshweni: Abantu bona bahlakaniphile. Uluthi lona luqamukile. Sizaqala lapha kuviki ezayo.
