uMthunywa
Ethel Ncube
IQEMBU lePub Choir lizabe likoBulawayo lijayivisa abantu kuyonale inyanga mhlaka 23 kuMbimbitho emagumeni eZimbabwe International Trade Fair (ZITF).
Iqembu leli lizabe lihlabela kanye lozulu kuqhunswa ezake zadla ubhedu.
UMthunywa uxhumane loZey onguye olungiselela umcimbi lo oveze ukuba iqembu leli lijonge ukuhlanganisa uzulu.
“Injongo yePub Choir yikuhlanganisa uzulu endaweni ezinjengalapho okudlelwa khona, emabhawa kumbe loba ngaphi lapho uzulu angahlangana khona kuhlatshelwe ingoma ezimnandi ezakudala abantu belalele njalo behlabela. Uzulu uyabe ejabula ndawonye lathi kumcimbi owehlukene leminye,” kubika uZey.
Uqhubekele phambili echaza ukuba kuzahlatshelwa ingoma ezitshiyeneyo.
“Indikimba yalumcimbi ithi ‘Ingoma owawuzilaleliswa nguyihlo’ ingoma lezi zibalisela abahlabeleli abatshiyeneyo. Ingoma ezizahlatshelwa ngezikaDolly Parton, Kenny Roggers, Freddie Gwala, Lovemore Majaivana amaSololo lezinye ezinengi.
“Sithanda ukunxusa uBulawayo ukuthi aze ngobunengi bakhe azojabula ndawonye lathi,” kuphetha uZey.
