uMthunywa
Nkosilathi Sibanda
INKOKHELI zekolitshi lokulolonga umdlalo wenguqu kuPonel Youth Soccer Academy zibika ngokuzithemba ukuthi ngomnyaka ozayo zizethula inhlelo ezizaphakamisa abadlali.
Zithe ukuvuleka inkundla zomdlalo ngemva kokuvalelwa yiCovid-19 okwenze kwabalula ukuthi baqhubekele phambili ngenhlelo zokufundisa intsha umdlalo wenguqu.
Ngomnyaka ozayo, inhlelo lezi kubikwa zizafika kuzinga eliphezulu ngokubika komqondisi wePonel Youth Soccer Academy uNelson Ndeka.
UNdeka uthe lonyaka baqhube kuhle nanko inani labadlali balo liyanda ngokuya kwamalanga.
“Babuya ngobunengi babo abadlali bedinga ukufundiswa ngebhola. Ngomnyaka ozayo sihlose ukuthi siqhubekele phambili ngakho,” kutsho uNdeka ngoLwesithathu emini.
IPonel Youth Soccer Academy yilo lodwa ikolitshi lenguqu elisemthethweni eDete, esabelweni seMatabeleland North.
UNdeka uthe ngaphandle kokuthi baqinele ekutholeni abadlali, balenjongo yokuthi baqhelise isitolo sabo sempahla.
IPonel Youth Soccer Academy yavula isitolo esithengisa impahla yenguqu edindwe ibizo layo ngomnyaka ka2020. Kwabayisiqalo esibonakala njengesibonelo sokuthi amaqembu enguqu ayenelisa ukuqhuba inhlelo ngokwenza amabhizimusi.
“Umqondo wethu ubanzi njalo uyacaca. Ukuphatheka kubhizimusi lempahla kusikhuthaza ukuthi sidinge imali ezasebenza kunhlelo zethu ezinengi.
Kusenjalo, uNdeka wazise ukuba mhlaka 17 Mpalakazi bazaqhuba umcimbi wokubonga abadlali babo.
