uMthunywa
PHEZU kokuthi umqeqetshi we-Orlando Pirates, u-Eric Tinkler, eseke waphumela obala ngokuthi akakhangelelanga lutho emakethe njengoba kuvulwe iwindi kodwa imidlalo emibili edlule ye-Absa Premiership inika umfanekiso ohlukeneyo ngamaBhakabhaka, abonakala ebuthakathaka ikakhulukazi emuva.
Ngesonto eledluleyo leliqembu lingenelwe amagoli amathathu lidibene leMaritzburg United, umdlalo wacina uphele ngo 3-3. Ngempelasonto lihlulwe yiJomo Cosmos ngo 1-0.
Lokhu kulahla amaphuzu kwePirates akuyisizi ngalutho njengoba isatabalasa endaweni ka-12 ku-logu.
Ngemuva komdlalo we-United, uTinkler wathi abakhangeli emakethe, abadlali abakhona eqenjini yibona okuzomele batshengise ukuzethemba, babhukule balwele iqembu. Lokho okwenzeka enkundleni langaphandle kwayo kutshengisa ukuthi ikhona inguquko edingeka ukuthi yenzeke, ikakhulukazi kubadlali abasemuva.
Udonga lwePirates oseluyibambe iminyaka kuleli qembu linqoba izicoco, uSiyabonga Sangweni loHappy Jele babelimele okungapheliyo, uRooi Mahamutsa nxa enikwe ijesi wenza amaphutha, emdlalweni weCosmos ubelilahla ibhola. U-Ayanda Gcaba utshintshwa njalo izindawo njengoba ebekwa ezinhlangothini. Lobu buthakathaka buphoqa umdlali wasesiswini u-Issa Sarr ukuthi ahlale emuva esiza udonga.
Lokhu kukodwa kutshengisa ukuthi iPirates iyadinga ukuthola abadlali abazavimba emuva. Ekhuluma ngemuva komdlalo phakathi kweviki, uTinkler ukhalaze ngokulahla kwabo amaphuzu amathathu. — Ubulembu
