uMthunywa
YiNtatheli kaMthunywa
KULEPHOLISA elihlala elokitshini leNtumbane koBulawayo okubikwa lizithezele olulenkume ngemva kokutshontshela isotsha imali.
Ipholisa leli elingumsolwa uGodwin Mzhunduki okungasatholakalanga iminyaka yalo yokuzalwa kubikwa latshontshela umamangala olisotsha uEmmanuel Vaka mhlaka-22 kunyanga edluleyo.
Kubikwa ngelanga leli ababili laba babenatha utshwala kwaze kwaba phakathi kwamabili. Umsolwa kubikwa watshontshela umamangala imali yakhe ngemva kokunanzelela ukuba wayesedakiwe.
Ngelanga elilandelayo kubikwa umamangala wabuza umsolwa ngokucatsha kwemali yakhe. Kuzwakale ukuba umsolwa kazange athande ukuphumela egcekeni ngokucatsha kwemali le okwabangela ukuba udaba lubikwe emapholiseni.
Umsolwa wacina esebotshwa. Ethonisiswa ngumantshi uTemba Chimiso umsolwa walile ukuba watshontshela umamangala.
Umsolwa uveze ukuba kazange atshontshe imali le kodwa wananzelela ukuba umamangala wayesedakiwe ngakho wasemthathela imali le esenzela ukuba engatshontshelwa ngabantu njengoba kwasokuhwlile.
Umsolwa uqhubekele phambili wathi wacela umamangala ukuba ameboleke imali engange-$340 ngakho wasemeboleka.
Ngakolunye uhlangothi umamangala wale wemba phansi ukuba waboleka umsolwa imali.
“Nkosi njengoba sasinatha ebusuku ngatshiyela umsolwa imali yami ngoba ngisesaba ukuba ngizathathelwa ngabantu.Ngasuka ngabuyela emsebenzini.Ngelilandelayo ngacela umsolwa ukuba abise imali yami kodwa wehluleka ngoba eseyidlile ngakho wanginika imali engange-$180 kuphela,”kutsho umamangala.
Lanxa umsolwa ezame ukuzigeza kulelicala inkundla imfumane elecala lokutshontsha imali.
Umantshi udlulisele phambili ukuthonisiswa kwecala leli. Umtshutshisi bekungu Mnumzana Whatmore Tembo.
