uMthunywa
Nkosilathi Sibanda
KULEPHOLISA leHarare uBlessing Chidziva elitshengise ukuthi belingeke liphume eTrade Fair lingathwalanga lutho, nanko phela libe yintshantshu yeCoca-Cola Four-Minute Mile.
UChidziva uthole i$800 ngemva kokugijima waphosa ukuphela umoya ngesikhathi etshaya intambo ngemizuzu emine elemzuzwana elitshumi lane.
Labadlali abaphuma koBulawayo, abakade bekhangelelwe ukuthi banqobe, basele bebambe amaqolo ngesiqubu esikhitshwe lipholisa leli ebeliqala ukunqoba kumjaho. I
pholisa leli belichinsa ukunqoba njalo ngomnyaka odluleyo laqeda likunombolo yesitshiya galolunye.
UChidziva oleminyaka engamatshumi amabili lasithupha yokuzalwa utshiye isigijimi sase-Bindura University uNyasha Mutsetse ngengxenye yomzuzu.
EzakoBulawayo zibonakale ngokuhoqa ngemva komdlalo, kungela phakathi kwabo ophutshe ekunombolo ejabulisayo.
Inengi labagijimi abaphumeleleyo kulumncintiswano livela kuqembu leBlack Rhinos leZRP.
Iphephandaba likazulu libuze ipholisa ngokunqoba kwalo labika ukuba libonga umzali walo ngokulisekela.
“Ngibonga ubaba wami ngokungisekela lokungikhuthaza ukuthi ngiqhubekele phambili ngokugijima. Ubaba wami wathi ngiqine ingqondo nxa ngifuna ukunqoba imincintiswano enjengale. Yikho engikwenzileyo.”
Inhlanganiso yeBulawayo Athletics Association yethule umbiko wokubonga amaqembu eBlack Rhinos leZRP ngokuqhubeka esekela umdlalo wokugijima.
“Siyananzelela ukuthi kumincintiswano yethu eminengi kwandise ukuthi kugijime amapholisa lamasotsha. Sebebanengi abagijimi asebethole imisebenzi kulezi inhlanganiso eziqhubeka zisekela umdlalo wethu wokugijima koBulawayo,” kutsho uMpofu.
Nanti uluhlu lwabagijimi beCoca-Cola Four Minute Mile lonyaka:
1 Blessing Chidziva ($800)
2 Nyasha Mutsetse ($400)
3 Luckmore Vaveri ($350)
4 Nomore Wiriki ($300)
5 Isaac Mpofu ($250)
6 Tendai Zimuto ( $200)
7 Trust Hove ($125)
8 Levison Mapfuwa ($100)
