uMthunywa
Gladmore Ncube loCornelius Luphahla
INKUKHU iyawanatha amaqanda ayo, lesisaga sigcwaliseke ngelinye inina lesigabeni seMachilongwana eBinga elibanjwe xhaka ngesinye isanuse lizitika ngenyama yomntanalo lithi liziqinisa ngayo njalo selidle abantwabalo abathathu.
Isiga lesi senzakale kuviki ephelileyo lapho uNkosazana Bridget Mwembe othethwe nguMnumzana Alois Dube abanjwe khona nguMnumzana Kakopi Mudimba esidla inyama yomntanakhe engcwabeni ethi uziqinisa ngayo.
UMthunywa uzwe ukuthi uNkszn Mwembe sewabhujelwa ngabantwana abathathu besanda kubelethwa okuyikho okwabangela ukuthi abakwabozala bayedinga inyanga yazolungisa ingcwaba lomntwana lo wasetholakala esidla isidumbu somntanakhe.
Ekhuluma lentatheli uMnumzana Nkululeko Mpande oyisakhamuzi sakule indawo uthe indaba le iyabethusa njengezakhamizi.
“Kwathi kumpondozankomo ngezwa umsindo komakhelwane ngavuka ngaya khona. Ngathi ngifika ngathola uNkszn Mwembe enqunu egqagqelwe yizakhamizi engcwabeni lomntanakhe. Ngathi ngibuza ukuthi kwenze njani bangitshela ukuthi bamthole khonapho esidla inyama yesidumbu somntanakhe.
“Lokhu kwangethusa kakhulu sasesimbuza ukuthi kungani ekwenza wathi ubefuna ukuziqinisa ngayo. Lokhu kungimangalisile kakhulu sasesigqibela ingcwaba leli sasuka lapho saya kwabozala okuyikho engahle ngasuka ngaya emzini wami ngoba ngasengithithibele kakhulu,” kutsho Mnu Mpande.
Ebuzwa ngale indaba uNkszn Mwembe uvumile ukuthi yenzakala wathi uhlutshwa lidlozi likagogo wakhe.
“Kuliqiniso sibili ukuthi ngabhujelwa ngumntwana ngazibona sengisengcwabeni lakhe kodwa kangikwzi ukuthi ngangidingani njalo ngilobani. Okwadala ukuthi ngenze lokhu yikuthi ngihlutshwa lidlozi likagogo wami ozala umama njalo abaphurofethi bahlala bengitshela ukuthi yilo elingiqedela abantwana. Sengiswele ukuthi ngenzeni ukuze ngilixotshe lelidlozi ngoba lingithwalise nzima,” kuchaza uNkszn Mwembe.
Ekhuluma lentatheli uMnu Dube uthe udidekile ngendaba le ngakho ngeke akhulume lutho.
“Mina ngisadidekile ngendaba yokuphelelwa ngabantwana ngingazi ukuthi badliwa ngumkami ngakho okwakhathesi akulalutho engingalukhuluma,” kutsho uMnu Dube.
Induna yakule indawo induna uSaba ithe ibuzwa ngale indaba yathi ayikayizwa kodwa iyamethusa.
“Indaba yenina elibanjwe lisidla isidumbu somntanalo kangikayizwa kodwa iyangimangalisa kakhulu sibili,” kuphetha induna uSaba.
