uMthunywa
Cornelius Luphahla
INTSHA yeMfanyana eNtabazinduna isisungule isivande semibhida kanye lomumbu ithelela ngamanzi esifula sezititshi ngenhloso yokuzithuthukisa njengoba nje kulohlupho lwamanzi kulindawo.
Isivande lesi kubikwa sisungulwe ngamalunga entsha amabili, uMnumzana Jonah Mtisi loMnumzana Luke Chatukuta ngemva kokunanzelela ukuthi inengi labo kalila msebenzi wokuzithuthukisa.
Iphephandaba likazulu livakatshele kule indawo lakhulumisana lomunye wabanini balesisivande uMnu Mtisi othe isivande lesi sebelomnyaka basisungula ngenjongo yokuthuthukisa intsha.
“Isivande lesi sisiqale ngenyanga kaMbimbitho kumnyaka ophelileyo ngemva kokunanzelela ukuthi inengi lentsha yalapha kalisebenzi kungakho isivande lesi sizabancedisa ukuthi bazithuthukise.
“Khathesi sesadinga abanye ontanga esisebenza labo osokusenza ukuthi siqhube lula umsebenzi wethu,” kutsho uMnu Mtisi.
UMnu Mtisi uqhubekele phambili njalo walandisa ukuthi izilimo zabo bazithengisela izakhamizi kanye lamapholisa akule indawo njalo bakhangelele ukuqhelisa isivande sabo.
“Izilimo zethu sizithengisela izakhamizi zakule indawo kanye lamapholisa njengoba kungela esinye isivande kule indawo.
“Lokhu kwenza kubelula ukuthi sithole abantu bokuthenga izilimo zethu.
Khathesi sikhangelele ukuthi siqhelise isivande sethu ukuze senelise ukulima izilimo ezinengi njalo ezitshiyeneyo,” kutsho uMnu Mtisi.
Ekhuluma lentatheli uMnu Chatukuta omunye wamalunga alesisivande uchaze ukuthi sebathenga amaphayiphi okuthelelisa kanye lempompi zakhona njalo bazathenga amanye.
“Noma nje saqala sizithwalela amanzi okuthelela kodwa sesenelisa ukuthenga amaphayiphi kanye lempompi zokuthelela.
Lokhu kwenza kubelula ukuthi sithelele izilimo zethu ngoba sifake impompi lezi emanzini besesixhuma amaphayiphi sithelele.
“Okwakhathesi sikhangelele ukuthi sithenge ezinye njalo impompi ukuze singathwali nzima nxa sithelela izilimo zethu.
Lapho-ke sizangezelela njalo intsha esisebenza layo ukuze yenelise ukuzithuthukisa,” kuveza uMnu Chatukuta.
UKhansila wakule indawo uMnumzana Bekithemba Qongo uchaze ukuthi uyajabula kakhulu ngomsebenzi owenziwa yintsha njalo ukhangelele ukuthi bengagebha idamu labo basungule isivande esifana lalesi.
“Kuyajabulisa ukuthi intsha yalapha sisungule isivande sayo okutshengisa ukuthi iyathuthuka noma nje isebenzisa amanzi ezititshi.
“Lokhu kutshengisa ukuthi idamu lethu leMfanyana lingaphela ukugejwa intsha yalapha izathuthuka ngamandla njengoba iyabe silamanzi eduzane.
“Isifiso sethu yikuthi ezinye inhlanganiso zisincedise ekugebheni idamu lethu ukuze sithuthuke kwezokulima singasebenzisi amanzi angcolileyo,” kuphetha uKhansila uQongo.
