uMthunywa
Buhlebenkosi Gaule
KULENTOMBAZANA eleminyaka engu-14 yesigabeni seTobotobo eNsuza ebhaxabulwe kabuhlungu ngelinye inina yaze yaqaleka kulandela ukuyibamba xhaka ithandelane lomkayo esixukwini.
Isiga lesi esiyindaba esegudwini senzakale kuviki ephelileyo ngoMgqibelo emini lapho umamangala lo abanjwe xhaka eloNolwazi Ngwenya nguSimilosenkosi Tshuma.
Iphephandaba likazulu libikelwe ngomunye umfakazi owayekhona ngesikhathi kusenzakala lokhu uNkosazana Emelda Nkomazana obike ukuba wezwa umsindo uvelela duzane lesibholane lapho athi efika wathola uMaTshuma ebhuqa umamangala ethi umfice ethandelane lomkakhe.
“Mina ngangithelela ngezwa sokulomsindo ngagijima ngayafika ngathola uMaTshuma ngokuzonda ebhula umntwana engananzeleli ukuba useqalekile ngafika salamula sincedisana labanye omama abasebegijime bazobona okwenzakalayo.
“Sithe sesibambe uMaTshuma kulapho esenelisa khona ukumbuza ukuthi wayetshayelani umntwana lo aze aqaleke wachaza ukuba uthole umkakhe uNgwenya elalo unkazana esixukwini,” kutsho uNkszn Nkomazana.
UMthunywa uxoxisane loMaTshuma ovumileyo ukuba kuliqiniso ukuthi watshaya intombazana ayithola ilomkhakhe uNgwenya loba engasathandanga ukukhuluma esiyaphambili.
Usobhuku wakuleyondawo uNkosikazi Yvonne Longwe uvumile ukuba indaba le yabikwa kuye.
“NgoMgqibelo ngabona abanye omama besigabeni bebuya begijima omunye wakhona wayekhala esithi uMaTshuma sefuna ukubulala intombazana ayithole ilomkakhe uNgwenya ngoba abanye bakhona babecabanga ukuba lowontombazana wayesefile kukanti wayeqalekile.
“Untombazana lo ngomunye wamantombazana esigabeni esesike sazama labanye omama ukuhlala labo phansi sibakhuza kodwa abalaleli ngoba kumele ngabe bafunda ingwalo zabo kodwa bona bayahlupha,” kutsho uNkszn Longwe.
