uMthunywa
Cornelius Luphahla
SEBEPHENDUKE umhlambi kazelusile abafundi bekolitshini yeFaith College eCowdray Park koBulawayo nanko phela sekuvele ukuba kulabanye babo abaficwe bephaquza imbanje abanye benatha utshwala ngomunye umbalisi phakathi esikolo andubana bazame ukumtshaya, uMthunywa ukuzwile lokhu.
Ihlazo labafundi laba lenzakale ngoMvulo kuyonale iviki lapho abafundi bekolitshi le abalitshumi okugoqela abafana lamantombazana abafunda uFomu 2 kusiya kuFomu 4 abatholwe ngomunye wababalisi bebhema imbanje ngemva kwekilasi abanye bezinathela utshwala bengagqize qhakala ukuthi basesikolo.
Kuzwakale ukuthi abafundi laba batholakale bebhema ngesikhathi sokufunda njalo kubikwa besokuyinhlalayenza lokhu.
UMthunywa uzwe ukuthi umbalisi lo watshelwa ngomunye umfundi ngendlela abafundi laba abaziphatha ngayo okuyikho okwabangela ukuthi babhacwe.
Iphephandaba likazulu lixoxisane lomunye umzali olomntwana ofunda kulesisikolo uNkosazana Siphilisiwe Nare wathi usola ababalisi ngokwehluleka ukubona ukuthi abafundi bayaganga esikolo.
“Mina ngisola ababalisi bakulesisikolo ukuthi kungani bebengakuboni ukuthi abantwana benza ukuganga esikolo.
Okunye njalo okungimangalisayo yikuthi abantwana bangena njani lotshwala esikolo.
“Lokhu kuveza ukuthi isikolo lesi asilamthetho oqinileyo yikho abantwana bezenzela intando yabo ngoba bayazi ukuthi umthetho walapha uyekethiswa kakhulu,” kutsho uNkszn Nare.
Ekhuluma loMthunywa uMnumzana Timothy Moyo omunye wabazali babafundi abatholakale bephaquza imbanje kulesisikolo uchaze ukuthi kalankani ngesenzo esenziwe ngumntanakhe.
“Kangilamathe ngokuganga okwenziwe ngumntanami kodwa kangilacebo engingalenza ngaphandle kokumkhuza.
Ngiswele ukuthi ngingamfundisa ngaphi njengoba ezinye izikolo zikhatshana njalo angilamali yokumgadisa umtshova ukuthi ayefunda khatshana,” kutsho uMnu Moyo.
Omunye wababalisi abafundisa kulesisikolo ongathandanga ukubethwa ngegama uveze ukuthi abafundi laba kukhanya bathenga utshwala lobu kweyinye itshabhini eseduze lalesisikolo.
“Abafundi laba abatholakale benatha utshwala bebhema lembanje kukhanya utshwala lobu babuthenga etshabhini yakoMakoni eseduze lalesisikolo.
“Itshabhini le iyavumela abantwana bathenge utshwala lapha ngakho kufanele akhuzwe umnikazi wayo,” kutsho umbalisi lo.
Imizamo yokukhulumisana lomnini-tshabhini le uNkosazana Farisayi Makoni yehlule ngoba utholakale engekho endlini yakhe njalo ucingo lwakhe lwalile ukungena.
UMqondisi wezemfundo esabelweni sakoBulawayo uMnumzana Dan Moyo ebuzwa ngale indaba uthe kakayizwa njalo kasazi lesisikolo.
“Indaba le kangikayizwa njalo isikolo leso singabe singekho emthethweni ngoba kangisazi,” kuphetha uMnu Moyo.
