uMthunywa
Johas Moyo
IZAKHAMIZI zeCowdray Park endaweni eyaziwa ngokuthi kukoHlalani Kuhle koBulawayo ziphakathi kwetshe lembokodo ngenswelaboya ezihlasela ziphinde zibulale abantu endaweni le.
Kubikwa ilanga lingatshona abantu abahlala endaweni le bahamba nzima nxa besuka koHlalani kuhle besiya emangcwabeni eLuveve ngoba kungela sibane okwenza izigebenga zicathamele abantu kuleyondawo.
UMthunywa uzwe ukuthi sokulabantu abambalwa asebafayo kulindawo ngemva kokuhlaselwa yizigebengu lezo.
Ukhansila wakule indawo uCollet Ndlovu ekhuluma loMthunywa uthe izigebengu sezizinengi elokitshini lelo njalo sebebanengi abantu abahlaselwayo.
“Sekukanengi sisizwa ngokuhlaselwa kwezakhamizi lapha njalo njengenkokheli sikhangelele ukuthi siphume lamaqhinga okuvikela abantu.
“Kuyasimangalisa kodwa ukuthi abantu laba abahlasela abantu bavela ngaphi ngoba izehlakalo lezi zenzakala ebusuku njalo umnyaka ususiya phela ukhona owabulawayo kuleyo ndawo.
“Kuyonale iviki ngibikelwe ukuthi bakhona abantu abakhanyisayo ngezibane ezinkulu ezingani ngezabazingeli ebusuku ngehola letshumi ebusuku kuleyondawo kodwa asila qiniso lokuthi kwenzakalani njengoba kulabantu abagangayo kuleyo ndawo,” kutsho ukhansila Ndlovu.
UMthunywa wenelisa ukuxhumana lesinye njalo isakhamuzi esiveze ukuthi uhlupho abalalo lukhulu ngoba labo abasenelisi ukuthemba umthetho ngoba kuhleli kuleqembu labantu abazithi ngabomthetho lababengabomthetho asebehlukuluza abantu.
“Kulamasotsha kanye lamapholisa asebangela uhlupho lokuhlukuluza kwabantu elokitshini njalo asingeke sazi ukuthi nxa izinto zimi ngalolo hlobo ngobani abagangayo.
“Kuthe kubotshwe izigebenga ezihluphayo sajabula kakhulu kodwa isimanga yikuthi abantu lokhu behlaselwa okutsho ukuthi izigangi lokhu zikhona,” kutsho isakhamuzi lesi.
Izakhamizi ezikhulume loMthunywa zicele ukuthi ikhansili izifakele i- fly over kuleyo ndawo.
“Sicela ikhansili isifakele i-fly over ukuze singahambi umango omude njalo lokhu kuzasivikela ekubanjweni inkunzi.
“Sicela njalo ukuthi kufakwe izibane ukuze izigebengu zikhanye zisesekhatshana,” kutsho uPhilani Dube.
