uMthunywa
Uyakunanzelele ezimfeni isikhathi esinengi sokulabantu asebezibazele, bazicazela umkhuba ongajwayelekanga esintwini sakithi.
Imfa yinto ehloniphekayo loba uhamba, ukunyathela kwakho kumele kutshengise ukuthi ngalelo langa kukhona okungamanga kuhle.
Lalapho usuhleka awuliqakamisi ilizwi lakho ngoba funa bacabange ukuthi ngaphakathi uthabile, kumele unyathele okulokuthobeka.
Sokulomkhuba omubi osukhona lezinsuku.
Singananzelela nxa sekuthe kwangcwatshwa uMfundisi esevale ngomthandazo esesicelela indlela kuMvelinqangi ukuthi ahambe labahambayo njalo asale labasalayo.
Kungakachithekwa kuqala kuthiwe abavela khatshana ababuye esililweni bayothola okuya ethunjini kuqala andubana bangene indlela.
Kulapho othola umuntu egijima efuna ukuba ngowokuqala.
Ngikhumbula sikomunye umngcwabo bahaluzela omama begijima ukuthi bayekuba ngabakuqala ukuphiwa ukudla, phela kwakuhlatshwe zaba mbili inkalakatha zenkabi.
Nxa ukhatshana wawungazifanisa lendlovu, kanti omunye wabo intambo zamathenisi zasezikhululekile wagwenxeka wayakuwa le wenyela idolo ngenxa yokujaha lokhu kudla.
Abanye uzwa besithi thina singabamaphilisi sebefuna lokuthi badle lomufi engakangcwatshwa.
Isimanga nje ngiyake ngizwe odokotela beqonqosela ukuthi nxa uzazi ukuthi ungumuntu wamaphilisi kumele uhambe uthwele umphako wakho ukwenzela ukuthi bangakuphuzela suvula umphako wakho uzihlalele uzidlele kulokuthi ubeyinhlekisa usuhamba usuphakululisa abantu bengakaphethi imisebenzi yabo.
Njalo nxa ungasi sihlobo segazi lapho okufiwe khona ungaze wafuna lokhu lalokhuya sengani nguwe umnini pulazi.
Zama ukuziphatha, umelele ukuphiwa.
Khona nxa kufiwe emakhaya kwabuya abasedolobheni, phela inengi labo ungani inyama bayabe beyiqabuka kodwa balale behuda ufice bengcolisile ngemva kwezibaya ngoba lethuba lokuthi bangene endlini encane lingasekho.
Yikho ngisithi nxa lawe ungaba semfeni zibambe uzibuthe uze ubuyele isililo sesiphelile.
Ayixabene.
