uMthunywa
BAKAMALANDELA kwakuthi nxa umuntu ehlaselwa yimbilaphi kube kukhona isilonda esiyabe sisolwa yimbilaphi le njengoba abadala bethi imbilaphi isola isilonda. Nanku ke sokusenzakala manje sikubona ngamehlo abantu sebevuka eseganga benza imigilingwana esingeke sayiqeda.
Lonyaka asazi bakwethu sizamila inkwili singasiManyanyadu owabonwa ngabadala. Kambe ngubani owake wakubona kusenzakala ukuthi kuthiwa umuntu uyathengisa inkosazana libalele engagqize qhakala? Angithi nje endulo kwakuyinhlaka yotshani lokhu esesikubona kusenzakala emphakathini.
Ngensuku zaboMandulo kwakungeke kwenzakala lokhu indoda eyayingalokotha idlale ngegeja kuziliwe yayingahle iyephekela amadada ngoba iyabe iletha umunyu emphakathini. Yikho ke kwakungavamanga ukuthi uzwe kuthiwa kulomuntu otshaywe yinkosazana osokuyinsakamvukela umchilo wesidwaba kulezinsuku.
Kambe okwalonyaka ngubani ongakuboniyo ukuthi kukhona osokungenile koMthwakazi? Angithi nje abantu sebephelile beqedwa yinkosazana okuyinto eyayizila endulo? Isimanga yikuthi sokuzwakala ukuba izulu leli lithengiswa ngabantu asazi ukuthi munyu bani osengene koMthwakazi abantu baze bavuke ubunke benze izimanga ezinje?
Ngensuku zendulo izulu lalitshaya izihlahla lezifuyo kuphela njalo kwakuthi lingatshaya isifuyo kungathandabuzeki ukuthi kulokuhlungwa thile phakathi. Kathesi abantu abaselanhloni sebezivezela ukuthi yibo abakhunkulayo?
Kambe kungabe kungene sifo bani koMthwakazi.
Mthwakazi kaNdaba buphi ubuntu lokuthula okwakubusa ensukwini ezedlule okhokho besazijabulela ngempilo?
Njengoba sisazi ukuthi udiwo lufuze imbiza kambe lokhu osokusenzakala khona kuvela ngaphi ngoba okhokho babengakwenzi ngensuku zabo? Laguguda isizwe saqothuka sasala ngempande kutheni bakaMalandela.
Angithi nje inziki yakoMalamndela iLupane, iNkayi leTsholotsho yizo osokuthengiswa khona inkosazana libalele?
Lafa elihle kakhulu sibhekile bakwethu. Yebo kambe kuthiwa lixhotshwa libhekile kodwa akutshiwo lokhu esokusenzakala ngoba lapha kalisaxhotshwa kodwa selimane labulawa kwangabi ndabazalutho.
Khona kambe nxa kuthiwa umuntu uthengisa umbani abantu bona bathini ngaye? Khona yena uyabe elesibindi bani esigabeni ongabikela uzulu isiga esingako enganake lutho? Lazo inkokheli zesigaba kambe nxa zimgcina ziyabe zithembeni njengoba ezaqothula isigaba?
BakaMalandela kasiguqukeni ukuze sifundise abantwabethu ikusasa elihle. Phela nxa singaqhubeka sisenza izigigaba lezi esizibona zisenzakala kulezinsuku kakho umtwana ongalunga kwelizayo. Lapho ke singagcwaliseka isitsho sabadala esithi uTshaka usekhaya ngoba kakho ongasila.
Kasakhiwe ngokuthula isizwe singaze saphila impilo yamazimu esiwezwa ngamakhehla asemxhiliba. Kakho ongasihlangula nxa sivuka eseganga sisenzenje ngoba ephandela enye ngumntanayo. Ngithemba sengehlukanise imbambo lomgogodla osokusele yikuthi liyibenge liyibekele ikusasa bakaMthwakazi sizoyidla siyimhwabha kwelizayo.
Kusinwa kudedelwana bakwethu njalo kayaze yakhonkotha iphethe ithambo ngakho kasiyibambeni ingaze yatshelela ngoba kungaphela isizwe siqedana sodwa.
