uMthunywa
Ngithanda ukubonga kuHulumende obone kufanele ukuthi aguqule iminyaka yokukhula kwabantwana kusukela kuminyaka elitshumi lesithupha isiya kutshumi lesithobaminwe mibili.
Umntwana oleminyaka elitshumi lesithupha ukhakhayi lwakhe luyabe lungakaqini kangako ukuthi angenza izinqumo ezinye eziqakathekileyo empilweni yakhe, uyabe elokhu efuna ukuncediswa lapha lalaphaya okwenza ukuthi angacini esenza amaphutha.
Akhona amadoda ikakhulu labo abalezimali zabo zokudlalisa besebekwenza umkhuba wokudlala ngabantwana abangamankazana abangaphansi kweminyaka elitshumi lethoba minwemibili.
Bebebathatha babenze abafazi babo okwesikhatshana bekwazi mhlophe ukuthi umthetho welizwe ngeke ubenze lutho.
Inengi lamadoda ikakhulu eligula imikhuhlane yozocansi likholelwa ukuthi lingahlangana lowesintwana omncinyane oseseyintombi egcweleyo umkhuhlane uyelapheka, enganakile ukuthi sebulele ikusasa yomntwana, lapho esesithi uyakwenda ethola ijaha elingusowabo, legazi lakhe selingcolile.
Ngake ngathi ngisedlula kwesinye isikolo ngabona omunye ubaba esehlisa untombazane kuvava lwemota, njengoba lawe usazi ukuthi ilihlo alincitshwa ngabona indlela ayemqabuja ngayo langendlela ababebambene ngayo kwahle kwangicacela ukuthi akusuye mzali wakhe kodwa ngu-sugar daddy.
Ngabona ekhipha inkalakatha yemali yamadola eMelika eyiqhubela okungukhekhe lokhu lakho kuyamukela kumoyizela, ngapha indebe zalindoda sezibomvu njalo emnyama tshu ecwazimula ebusweni kungani yimbole isesizibeni, kwakuzikhanyela loba engahlolwanga ngudokotela ukuthi uphathekile emzimbeni.
Bakhona abavika ngenkolo zabo uthole umuntu elabafazi abanengi ebathatha esontweni ethi umoya kaNkulunkulu uthe, eyenga abantwana abancane kambe yena umuntu uyabe esekholise okomhlaba waze wadinwa afune ukuncindezele abantwana bona abayabe besacathula kumpilo yokuba ngomama.
Nxa ngibala incwadi engcwele kuGenesisi ngokuzwisisa kwami uNkulunkulu uthi uzakudingela uAdam umncedisi wakhe, kazange athi abancedisi bakhe etsho uEva, yikho isithembo ngingazwani laso ngoba ngikholelwa ukuthi uMdali kasithandi.
Lani bantwana nanko umthetho usulivikela ukwenzela ukuthi lifunde liqede izifundo zenu, nxa usufundile sungazenzela umathanda ngomzimba wakho ngoba lokhakhayi luyabe soluqinile kancane.
Kodwa isixwayiso sami yikuthi dinga osowenu litshiyane lemidodovu yamakhehla loba selitshengise lakuthembisa lemalini.
Ayixabene.
