uMthunywa
SILO MEHLELI DUBE
KWAKUTHI nxa sekwehle iyezi elimnyama elinye ilunga lomdeni selibizwe khona kobhekabezayo, ngitsho elizweni lemithunzana, kuphuthumiswa imilayezo lemibiko ngendlela ezitshiyeneyo kusaziswa izihlobo labangane abaseduze labakhatshana.
Wonke umuntu abhekise amabombo lapho osokuvele khona umonakalo, ngaphandle okuyabe bebambekile mhlawumbe yikugula, ukuswela imali zokugadisa kumbe ebambekile emsebenzini.
Bayafika abantu bakaMlimu kukhulunyiswane kukhalelwane, kukwejiswe eziko kubaswe umlilo, kusitsha ingxoxo, kuphikiswana ngendaba ezehlukeneyo ezisegudwini ngalesosikhathi.
Bakhona abazibona beqakathekile bona bahle badinge indawo yokulala kumbe kusezimoteni, besesaba ukuphandlwa yintuthu njalo lokubhuquka enhlabathini duze lalapho okubaswe khona umlilo.
Bavuka sebefuna ukudla bakhohlwe ukuthi emfeni akula muntu oyabe eqhatshiwe ukwenza konke lokhu, kodwa uyabe umuntu efuqwa luthando lenhlonipho. Abanye nxa kusemakhaya lapho elizigebhela sibi sengcwaba ababambi lutho, akhohlwe ukuthi kuyeza lakuye. Phela umoya wabantu bakhathesi suwehlukene kulowabantu bakudala, abakhathesi bayakhwitshiza.
Ngikhumbula omunye owayethanda ukufika ahle adonse ubhayi laye wathi mzukwana efelwe inengi ladonsa ubhayi imisebenzi enjengokupheka yama mpo.
Mhla umuntu ezavuka engcwatshwa abantu sebakwenza kwaba ngumkhuba wokuthi akulalwa kuyahlatshelelwa kuze kuse, yikho lawe landela lowo mfolo ngoba umphakathi uwubona uqondile ngaphandle nxa ulomkhuhlane thize.
Ayixabene.
Umlobi ungamthinta ku: 0714355641
