uMthunywa
Nkosilathi Sibanda
AMAQEMBU enguqu aku-Lupane Soccer League azathi ukuqinisa amalungiselelo esizini entsha kulandela umbiko wokuba sekulenkezo ezinengi ezizasekela umdlalo.
Iligi (league) le yazise ukuba phakathi kuzasungula lezo nkezo zeSuper Cup leyinye ezasekelwa ngusomabhizimusi uLetsweletse Nsimbi, ophinda abeyinkokheli yeqembu leMtshibini Young Stars.
Isikhulumi seLupane Soccer League uPermanent Sibanda uthe kuzajabulisa kumaqembu abo ukuzwa ngokuthi sekuzakuba lemincintiswano eminengi.
“Sizakwethula usekelo lwenkezo ezintsha phakathi komnyaka. Sikhangelele inkezo ezimbi. Lokhu kuyisitshengiselo sokuthi siyaphambili.”
Ngokutsho kukaSibanda, sekubonakala ukuthi kulethalenta elizwayo kulindawo. Ubike ukuthi ukusungulwa kweligi le kuza lamathuba amahle ngoba abadlali bezigaba ezehlukeneyo sebezaziwa labo kulumdlalo.
“Sikhangelele ukuthi sokuzakuba lomncintiswano omkhulu ikakhulu ukuphuma kwethalenta elicatshileyo emaphandleni. Iligi yeLupane Soccer League ihlose ukuvusa isigaba sethu. Idolobho leLupane yisigodlo seMatabeleland North ngakho kubalulekile ukuthi ukukhula kwalindawo kusekelwe yimidlalo enjengenguqu,” kutsho uSibanda.
Ngesizini edluleyo iqembu leMtshibini leleLupane City atshikilisana kubangwa ukuba yingqwele yeligi le kumidlalo embalwa esisele.
ILupane City yaphetha isiyintshantshu ihamba phambili ngemiklomelo. Ngaphansi kwengalane kwahlala iMhlahlandlela FC. Ezinye ezincintisa kuLupane Soccer League kuleShining Stars, iHotspurs leUnited Forces. Iqembu le-United Forces lidlalelwa ngamapholisa akuZRP labaphathi bamajele.
Inguqu yakulindawo ingaphansi kwenhlelo zeZifa njalo ilamaqembu asemthethweni ayisikhombisa kuphela.
Ukusabalala kwenguqu yeLupane kubonakala ngokusungulwa kwamaqembu ahwatsha ingcitshi zabadlali abalisa iMhlahlandlela elabadlali abaphuma esiqintini seMatshiya, iShining Stars eyeLupanda le-Invaders eyeShabula.
